Beint í æð er klassískur farsi eins og þeir gerast bestir.
Litli leikklúbburinn sýnir farsann Beint í æð eftir Ray Cooney, í þýðingu Gísla Rúnars Jónssonar, í Edinborgarhúsinu á Ísafirði um helgina. Beint í æð er klassískur farsi eins og þeir gerast bestir: Leyndarmál, misskilningur á misskilning ofan og allt á suðupunkti. Alls koma um 30 manns að uppsetningunni og þar af eru 10 leikarar.
Jón Borgar Eskildsen, stendur á barmi stærsta tækifæris starfsferilsins: Hann á að flytja Hippókratesarfyrirlesturinn og sjálf yfirlæknisstaða Heilbrigðisstofnunar Vestfjarða er undir. Í salnum eru allir sem máli skipta, ráðherrar, taugalæknar og fjáðir frumkvöðlar, auk eiginkonunnar auðvitað. En augnabliki áður en Jón Borgar á að stíga á svið dúkkar upp gömul vinkona sem hann hefur ekki séð síðan þau tóku „dálítið skrens“ bakvið svæfingavélina hér um árið og flytur honum óvæntar fréttir sem setja öll hans framtíðarplön í uppnám.
Hér er allt á suðupunkti – misskilningur, leyndarmál og ótrúlegar aðstæður sem fara hratt úr böndunum. Hraðinn er mikill, flækjurnar margar og hláturinn aldrei langt undan. Klassískur Cooney-farsi eins og hann gerist bestur!
Leikstjóri er Birgitta Birgisdóttir, en þetta er í fyrsta sinn sem hún leikstýrir hjá LL. Birgitta hefur þó áður leikstýrt á Ísafirði, hjá Leikfélagi Menntaskólans á Ísafirði, svo hún er öllum hnútum kunnug í Edinborgarhúsinu.
Sýningar Sunnudagur 8. febrúar kl. 20:00 Miðvikudagur 11. febrúar kl. 20:00 Föstudagur 13. febrúar kl. 20:00 Sunnudagur 15. febrúar kl. 20:00 Fimmtudagur 19. febrúar kl. 20:00
Kasper, Jesper og Jónatan eru duglegir að koma sér í vandræði í Kardemommubænum.
Leikfélag Mosfellssveitar setur upp ástsæla fjölskyldusöngleikinn Kardemommubæinn eftir Thorbjørn Egner.
Sagan gerist í hinum litríka og friðsæla Kardemommubæ, þar sem íbúar lifa í samhljómi en verða fyrir áskorunum þegar þrír kostulegir ræningjar („Kasper, Jesper og Jónatan“) halda til í bænum. Með hjálp bæjarfógeta, Soffíu frænku og annarra verður til hjartnæm og grípandi frásögn um vináttu, samkennd og umburðarlyndi. Tónlistin, samin af Egner sjálfum, hefur skapað hljóm sem mörg kynslóðir íslenskra barna þekkja og elska.
Kardemommubærinn (Folk og røvere i Kardemomme by) er skemmtilegt og sígilt barnaleikrit eftir norska listamanninn Thorbjörn Egner (1912–1990). Verkið á rætur að rekja til barnaútvarpsþátta í Noregi en árið 1955 kom sagan út sem bók með teikningum og tónlist eftir sjálfan Egner. Leikritið var fyrst sett upp á svið í Noregi árið 1956 og hefur síðan notið gríðarlegra vinsælda, bæði heima fyrir og í leiklistaruppfærslum um alla Norðurlönd.
Verkið var fyrst frumsýnt á Íslandi árið 1960 í Þjóðleikhúsinu í Reykjavík. Þetta markaði upphaf langrar ástar landsmanna á leikritinu; það hefur verið endursýnt reglulega í Þjóðleikhúsinu og er eitt af mest sýndu barnaleikritum hér á landi.
Tvö námskeið verða haldin í Þjóðleikhúsinu leikárið 2025 – 2026.
Áhugaleikfélög sem og leikfélög framhaldsskóla landsins eru mikil auðlynd og sinna gríðarlega mikilvægu starfi um allt land. Námskeiðin eru liður í að nýta þá þekkingu og hæfni sem býr í Þjóðleikhúsinu til þess í að styrkja og valdefla þá starfsemi og þar með leikhúsmenningu landsins til framtíðar.
Þann 27. september verður haldið námskið í framleiðslu og verkefnastjórnun.
Helgina 21. og 22. febrúar verður haldið námskeið í ljósa- og hljóðhönnun.
Námskeiðin verða kennd af framleiðslustjóra og tæknimönnum hússins og eru kennd í Þjóðleikhúsinu.
Ekki hugmynd er bráðfyndið gamanleikrit sem sýnt er í Borgarleikhúsinu.
Jæja hvað ætlarðu svo að verða?
Ekki hugmynd.
Hvað skuldarðu mikið í skatt?
Ekki hugmynd.
Hvað á leikritið að heita?
Ekki hugmynd.
Það er skelfileg stund í lífi hvers manns þegar tilveran hættir að vera hellað djamm og hótel mamma og verður virðisauki, viðbótarlífeyrissparnaður og almennur viðbjóður.
Snögglega breytist lífið í eitt stórt skyndipróf:
Heimsreisa eða háskólapróf? Smokkur eða snudda? Lán eða lífsvilji?
Ekki hugmynd er bráðfyndið gamanleikrit þar sem mannabörnin Arnór, Óli og Vigdís eru öll týnd á tímamótum og hafa ekki hugmynd um hvað þau eiga að gera. En með gríni, mis-heimspekilegum kenningum, söng og öllum tiltækum leikhústrixum ætla þau að finna út úr þessu og færa íslensku þjóðinni svar við ráðgátum lífsins!
Og hvert er svarið?
Eeeeeekki huuuuuuugmynd.
Ps. allir gestir fá að sjálfsögðu þátttökuverðlaun fyrir að mæta.
Gaflaraleikhúsið er þekkt fyrir stórskemmtilegar sýningar unnar lóðbeint upp úr íslenskum veruleika sem allir frá fermingu og fram á grafarbakkann geta haft gaman af. Þau settu síðast upp gamanleikinn gleðilega Tóma hamingju sem sýndur var fyrir troðfullu húsi allan síðasta vetur og uppskar að auki tvær tilnefningar til Grímunnar. Þau eru nú mætt aftur í Borgarleikhúsið með glænýtt grín til að gleðja okkur öll.
Með kjafti og klóm er sýnt í Samkomuhúsinu á Flateyri.
Leikfélag Flateyrar kynnir nýtt og spennandi íslenskt leikrit eftir tvítuga Flateyringinn Ölmu Sóleyju Önnudóttur Wolf.
Sagan gerist á afskekktum bóndabæ á Íslandi undir lok 18. aldar. Þegar ókunnug hjón koma óvænt á bæinn fer af stað atburðarás sem enginn sér fyrir endann á. Leyndarmál, spenna og óútskýrðir atburðir fléttast saman í áhrifamikilli sýningu sem heldur áhorfendum á tánum.
Díó kynnir nýtt sviðsverk sem frumsýnt verður í turni Elliðaárstöðvar laugardaginn 14. febrúar.
Jötungíma er sjarmerandi risasveppur sem hefur komið sér fyrir í steyptum turni í Elliðaárdal. Sveppurinn stendur frammi fyrir óbærilega leiðinlegu verkefni, að melta, flokka og endurvinna mannkynið og leifar þess. Vandamálið er að hann bara nennir því alls ekki. Jötungíma er einleikur fluttur af Hannesi Óla Ágústssyni.
Sviðslistahópurinn Díó hefur það að markmiði að gefa hversdagsleikanum epískan blæ og leika sér með sagnfræðilegar og persónulegar heimildir. Fyrri sýningar hópsins; Piparfólkið og Þær spila blak Hallelúja, hafa fengið mjög góðar viðtökur, lofsamlega dóma gagnrýnenda og tilnefningar til Grímuverðlauna.
Hópinn skipa: Jötungíma: Hannes Óli Ágústsson, Leikstjórn og yfirumsjón með handriti: Aðalbjörg Þóra Árnadóttir og Ylfa Ösp Áskelsdóttir, Ljósahönnuður: Ólafur Ágúst Stefánsson, Leikmynda- og búningahönnuður: Brynja Björnsdóttir, Kóreógrafía: Saga Kjerúlf Sigurðardóttir og DÍÓ, Hljóðhönnuður: Baldvin Magnússon, Animation og myndhönnun fyrir vörpun: Steinar Júlíusson, Myndun og vinnsla kynningarefnis: Björgvin Sigurðarson, Aðstoð við útlit leikara á kynningarefni: Sara Friðgeirsdóttir, Grafísk hönnun á kynningarefni: Rakel Tómasdóttir, Framkvæmdastjórn: Davíð Freyr Þórunnarson f.h. MurMur productions, Hugmynd og verkstjórn: Aðalbjörg Árnadóttir, Framleiðsla: Díó í samstarfi við MurMur productions og Elliðarárstöð
Ungir sem aldnir hafa um langa hríð látið heillast af frásögninni af stúlkunni Dóróteu sem, ásamt hundinum Tótó, hringsnýst fyrir tilviljun inn í ævintýralegt land Oz. Þar mætir hún ótrúlegum fyrirbærum: talandi fuglahræðum, fljúgandi öpum og galdranornum sem stjórna ríkjum. Einu leiðina heim finnur Dórótea með því að feta gula veginn að hinum dularfulla galdrakarli í Oz, þeim eina sem getur veitt henni hjálp. Ferðin reynist þó bæði erfið og hættuleg, en á leiðinni eignast hún óvænta félaga sem standa henni við hlið.
Sagan á rætur sínar að rekja til samnefndrar bókar Frank Baums og öðlaðist heimsfrægð með kvikmyndagerðinni frá árinu 1939, þar sem Judy Garland túlkaði Dóróteu. Síðan þá hafa fjölmargar sviðs- og kvikmyndaútgáfur litið dagsins ljós og vinsældir söngleiksins virðast óþrjótandi. Þar á tónlistin stóran þátt, með ódauðlegum lögum á borð við Somewhere Over the Rainbow og We’re Off to See the Wizard.
Leikstjórinn Þórunn Arna Kristjánsdóttir er leikhúsgestum vel kunn, enda hefur hún áður staðið að baki afar vinsælum barnasýningum á borð við Emil í Kattholti og Fíasól gefst aldrei upp. Í þessari uppfærslu leiðir hún glæsilegan hóp leikara og listrænna stjórnenda sem saman skapa bæði ógnir og töfra Oz-landsins í eftirminnilegri og áhrifaríkri sýningu.
Verkið fjallar um miðaldra hjón sem eiga í skrautlegum samskiptum við tengdaforeldra sína. Tengdapabbi sem á alltaf erindi við soninn og tengdamamma sem er alltaf að skipta sér af öllu. Hvernig enda svona samskipti, vel eða illa?
Farið verður í grunnatriði leikhúsförðunar á námskeiðinu.
Leiklistarskóli BÍL stendur fyrir námskeiði í leikhúsförðun dagana 24.-25. janúar 2026. Kennari er Ásta Hafþórsdóttir sem er einn fremsti förðunarmeistari landsins og þótt víðar væri leitað. Kennt verður í húsnæði Reykjavík Makeup School að Krókhálsi 6 í Reykjavík. Námskeiðið hefst laugardaginn 24. janúar og lýkur sunnudaginn 25. janúar. Lögð verður áhersla á helstu atriði í grunnförðun í leikhúsi fyrri daginn en seinni daginn fá nemendur að þeim þáttum sem þeir helst kjósa. Meðlimir aðildarfélaga Bandalagsins hafa forgang að námskeiðinu en opið verður fyrir aðra ef laus pláss verða.
Orka og ferskleiki söngleikjaformsins mæta átakaþrungnum heimi Íslendingasagnanna.
Ormstunga er glænýr og ferskur íslenskur söngleikur byggður á Gunnlaugs sögu ormstungu, sígildri sögu sem er í senn spennandi, fyndin og hjartnæm. Höfundarnir eru af yngstu kynslóð leikhúslistafólks og ná með glæsilegum hætti að vinna úr menningararfi okkar í nútímalegu og heillandi formi. Verkið er skrifað í anda hins heimsfræga stórsöngleiks Hamilton, sem ruddi brautina fyrir kraftmikinn samruna sögulegra atburða og krassandi tónlistar.
Fjölmargir leikarar Þjóðleikhússins koma fram í þessari kraftmiklu sýningu sem margt af okkar færasta leikhúslistafólki tekur þátt í að skapa. Ormstunga er söngleikur fyrir unga sem aldna, með grípandi og fjölbreyttri tónlist.
Saga um drauma, ástir og ill örlög. Frískleg og kraftmikil endursköpun á íslenskum menningararfi.
Gunnlaugur Illugason, Hrafn Önundarson og Helga hin fagra Þorsteinsdóttir mynda einn frægasta ástarþríhyrning fornbókmenntanna. Of lengi hafa örlögin hrjáð þau en nú fyrir framan áhorfendur fá þau loksins að gera upp sín mál. Gísli Örn er þekktur fyrir töfrandi sýningar og hér leiðir hann einstakan leikhóp.
