Leikritið Afsakið hlé! eftir Árna Ibsen verður frumsýnt í Litla Borgarleikhúsinu í Gömlu Borg í Grímsnesi föstudaginn 16. október. Lilja Nótt leikstýrir þessum gamansama gjaldþrotafarsa þar sem stórt egó, örvænting og tilraunir til að halda í glansmyndina leiða til sífellt flóknari aðstæðna.

Fyrirtækið er komið á heljarþröm, forstjórinn örmagna og framtíðin allt annað en björt. En Ævar Eiður ætlar ekki að játa sig sigraðan. Með aðstoðarmann sér við hlið reynir hann að halda í ímyndina, bjarga því sem bjargað verður og sannfæra sjálfan sig um að hann hafi enn stjórn á aðstæðum.

Í verkinu Afsakið hlé! tekst Árni Ibsen á við mannlega bresti, sjálfsblekkingu og örvæntingarfullar tilraunir til að halda andlitinu þegar allt virðist vera að hrynja.

Leikhúsupplifun í návígi

Sýningin fer fram í Litla Borgarleikhúsinu í Gömlu Borg í Grímsnesi. Leikhúsrýmið er lítið og sögufrægt og þar eru leikarar og áhorfendur í miklu návígi.

Nándin skapar sérstakar aðstæður fyrir sýningu þar sem samskipti persónanna, togstreita og kómískar uppákomur eru í forgrunni.

Átta sýningar á dagskrá

Frumsýningin verður föstudaginn 16. október klukkan 20.00. Alls eru átta sýningar á dagskrá, dagana 16., 17., 23., 24., 30. og 31. október og 13. og 14. nóvember 2026. Allar sýningarnar hefjast klukkan 20.00.

Miðaverð er frá 3.500 krónum og sætafjöldi er takmarkaður.

Leikfélag Sauðárkróks frumsýnir fjölskyldusöngleikinn Bláa hnöttinn í Bifröst föstudaginn 16. október. Sýningin segir frá ævintýrum barna á fjarlægum hnetti þar sem allt virðist leika í lyndi, þar til dularfullur gestur kemur til sögunnar og breytir lífi þeirra.

Á Bláa hnettinum ráða börnin ríkjum. Þar leika þau sér allan daginn, njóta frelsisins og þurfa aldrei að verða fullorðin. Lífið tekur hins vegar óvænta stefnu þegar maður að nafni Gleði-Glaumur lendir geimskipi sínu á hnettinum.

Gleði-Glaumur býður börnunum ýmislegt sem virðist nánast of gott til að vera satt. Smám saman kemur þó í ljós að gjafir hans og fyrirheit hafa sitt verð. Börnin standa frammi fyrir erfiðum ákvörðunum og þurfa að horfast í augu við afleiðingar þeirra.

Ævintýri um vináttu og réttlæti

Blái hnötturinn er söngleikur fyrir alla fjölskylduna þar sem húmor, gleði og ævintýri fléttast saman við umfjöllun um vináttu, réttlæti og ábyrgð.

Leikstjóri sýningarinnar er Ólafur Jens Sigurðsson.

Þrettán sýningar á dagskrá

Frumsýningin fer fram föstudaginn 16. október klukkan 18 í Bifröst á Sauðárkróki.

Alls eru þrettán sýningar á dagskrá hjá Leikfélagi Sauðárkróks, samkvæmt upplýsingum á vef félagsins. Sýnt verður á ýmsum tímum fram til sunnudagsins 1. nóvember, þegar tvær sýningar eru fyrirhugaðar.

Björk Jakobs, Salka Sól og Selma Björns eru mættar aftur á svið með nýja sketsa- og uppistandssýningu, „Bíddu bara – ÞETTA REDDAST“, í Bæjarbíói í Hafnarfirði. Sýningin byggir á vinsælu samstarfi þeirra úr „Bíddu bara“, en nú hafa ný lífsskeið og breyttar aðstæður bæst í reynslubankann.

Í nýju sýningunni taka þær stöllur á kunnuglegum viðfangsefnum úr daglegu lífi með húmorinn að vopni. Börn, barnabörn, svefnleysi og breytingaskeiðið eru meðal þess sem kemur við sögu, enda hefur ýmislegt breyst frá því þær stigu síðast saman á svið.

Salka Sól er orðin tveggja barna móðir og hefur, samkvæmt lýsingu sýningarinnar, ekki sofið út í sex ár. Selma Björns er komin á breytingaskeiðið og Björk Jakobs er orðin amma sem þarf nú að hlusta á börnin sín gefa henni ráð um barnauppeldi.

Sketsar, uppistand og frumsamin lög

„Bíddu bara – ÞETTA REDDAST“ er sketsa- og uppistandssýning með frumsömdum lögum í anda fyrri sýningar þremenninganna.

Í stað þess að draga upp glansmynd af hversdagslífinu beina þær sjónum að því sem gerist á bak við tjöldin, þar sem hlutirnir fara sjaldnast alveg eftir áætlun.

Sýningin er ætluð breiðum hópi áhorfenda og byggir á persónulegri reynslu, hversdagslegum uppákomum og aðstæðum sem margir ættu að kannast við.

Mikil aðsókn í Bæjarbíói

Sýningarnar standa yfir frá 8. október til 7. nóvember og hefur aðsókn verið mikil. Samkvæmt miðasölunni eru níu af tólf auglýstum sýningum þegar uppseldar.

Aukasýning hefur verið auglýst laugardaginn 31. október og enn eru sæti í boði á nokkrar sýningar.

Leikfélag Mosfellssveitar setur upp rokksöngleikinn Vorið vaknar (Spring Awakening) í Bæjarleikhúsinu í Mosfellsbæ. Frumsýning verður 9. október og er þegar uppselt á hana, en fleiri sýningar eru fyrirhugaðar í október og nóvember.

Vorið vaknar er söngleikur eftir Steven Sater með tónlist eftir Duncan Sheik og byggir á samnefndu leikriti þýska leikskáldsins Frank Wedekind frá 1891. Söngleikurinn var frumsýndur á Broadway árið 2006 og hlaut átta Tony-verðlaun, meðal annars sem besti söngleikur ársins.

Ungt fólk leitar frelsis

Í verkinu er sjónum beint að ungu fólki sem tekst á við þröngar samfélagslegar skorður á sama tíma og það uppgötvar eigin tilfinningar, líkama og sjálfsmynd. Ungmennin hafa að miklu leyti hvert annað til leiðsagnar og uppreisn þeirra gegn íhaldssömu samfélagi getur haft bæði fallegar og afdrifaríkar afleiðingar.

Rokktónlistin gegnir veigamiklu hlutverki í verkinu og fléttast þar saman við sögu um unglingsár, frelsisþrá, kynlíf og siðferði.

Þýðing sýningarinnar er eftir Orra Hugin Ágústsson og leikstjórar eru Aron Martin og Elísabet Skagfjörð. Þórhildur Hólmgeirsdóttir annast tónlistarstjórn, Eik Haraldsdóttir söngstjórn og raddútsetningar og Cristina Agueda er danshöfundur. Brynja Sigurðardóttir sér um leikmynd og búninga.

Með hlutverk fara Kristján Nói Kristjánsson, Emil Grettir Ólafsson, Elísabet Tinna Haraldsdóttir, Embla Sif Ólafsdóttir, Hildur Kaldalóns Björnsdóttir, Styrmir Sturla Dýrfjörð, Brynjólfur Skúlason, Hugrún Ylfa Ágústsdóttir, Katrín Ýr Erlingsdóttir, Örn Smári Jónsson, Andri Dan Hlynsson, Dóra Wild og Valgeir Skagfjörð.

Athygli er vakin á að sýningin er ekki við hæfi barna. Í henni er meðal annars vísað til kynferðisofbeldis, dauða, sorgar og missis og kynlíf, ofbeldi og sjálfsvíg eru sviðsett.

Punch var frumsýnt í Nottingham árið 2024 og var í kjölfarið sett upp í Old Vic í London. Þaðan fór verkið áfram á West End og Broadway. Þjóðleikhúsið segir íslensku uppfærsluna vera þá fyrstu sem fær heimild til uppsetningar verksins í kjölfar frumuppfærslunnar.

James Graham er höfundur leikritsins en Kristján Þórður Hrafnsson þýðir það á íslensku. Magnús Geir Þórðarson leikstýrir uppfærslu Þjóðleikhússins.

Jakob van Oosterhout fer með hlutverk Jacobs, Unnur Ösp Stefánsdóttir leikur Joan og Guðjón Davíð Karlsson leikur David. Einnig koma fram Edda Björg Eyjólfsdóttir, Hallgrímur Ólafsson, Jónmundur Grétarsson, Kristinn Óli S. Haraldsson, Sigurbjartur Sturla Atlason, Selma Rán Lima og Þuríður Blær Jóhannsdóttir.

Leikmynd er eftir Ilmi Stefánsdóttur, búningar eftir Filippíu I. Elísdóttur og lýsing eftir Björn Bergstein Guðmundsson. Conor Doyle sér um sviðshreyfingar, Gísli Galdur Þorgeirsson semur tónlist og Aron Þór Arnarsson annast hljóðhönnun.

Leikfélag Akureyrar frumsýnir Fasteignamartröðina 9. október, grátbroslegt samtímaverk um unga konu sem leggur af stað í leit að sinni fyrstu íbúð. Verkið er eftir litháenska leikskáldið Gabrielė Labanauskaitė og leikstjórn og þýðing eru í höndum Adolfs Smára Unnarssonar.

Eftir óvænt sambandsslit þarf Arnrún að finna sér nýtt þak yfir höfuðið. Hún getur ekki flutt aftur í foreldrahús og leigumarkaðurinn heillar lítið, svo niðurstaðan verður að reyna að kaupa fyrstu íbúðina.

Þar með hefst ferðalag um húsnæðismarkaðinn og heim bankastarfsmanna, fasteignasala og lánardrottna. Í Fasteignamartröðinni er fasteignakaupum ungs fólks lýst með grátbroslegum og fáránlegum hætti og verkið sækir meðal annars í absúrd og kómík.

Gabrielė Labanauskaitė er litháenskt leikskáld og var verkið valið besta erlenda leikritið á stærstu leikritunarhátíð Þýskalands árið 2021.

Urður Bergsdóttir í hlutverki Arnrúnar

Urður Bergsdóttir fer með hlutverk Arnrúnar. Aðrir leikarar sýningarinnar eru Hjalti Rúnar Jónsson, Hólmfríður Hafliðadóttir, Jökull Smári Jakobsson og Vigdís Halla Birgisdóttir.

Adolf Smári Unnarsson leikstýrir sýningunni og þýðir verkið. Brynja Björnsdóttir hannar leikmynd og búninga, Jóhannes Damian R. Patreksson semur tónlist og Gunnar Sigurbjörnsson sér um hljóðhönnun. Ljósahönnun er í höndum Fjölnis Gíslasonar, Júlía Gunnarsdóttir er dramatúrg og Harpa Birgisdóttir sér um hár og förðun.

Fasteignamartröðin verður frumsýnd 9. október og samkvæmt dagskrá Menningarfélags Akureyrar eru sýningar fyrirhugaðar í október og nóvember.

Leikritið Djöflar eftir sænska leikskáldið Lars Norén verður frumsýnt á Nýja sviði Borgarleikhússins 9. október. Hilmir Snær Guðnason og Vala Kristín Eiríksdóttir fara með hlutverk hjónanna Franks og Katarínu í þessum öskugráa hjónaleik þar sem gömul sár og bældar langanir brjótast upp á yfirborðið.

Erfidrykkja með óljósum leikreglum

Frank stendur í anddyri glæsiíbúðar þeirra Katarínu með tvo plastpoka. Í öðrum eru nýir skór en í hinum öskuker móður hans, sem á að jarðsetja daginn eftir. Von er á bróður Franks og mágkonu, en þegar þau afboða komu sína ákveða hjónin að bjóða nágrönnum sínum í heimsókn.
Það sem á að létta þrúgandi stemninguna tekur aðra stefnu. Drykkja og usli opna gömul sár og leysa úr læðingi bældar langanir. Úr verður óvenjuleg erfidrykkja þar sem svartur húmor, óljósar leikreglur og kostulegar uppákomur koma við sögu.

Hilmir Snær og Vala Kristín í hlutverkum hjónanna

Hilmir Snær Guðnason leikur Frank og Vala Kristín Eiríksdóttir fer með hlutverk Katarínu. Nágranna hjónanna leika Haraldur Ari Stefánsson og Íris Tanja Flygenring.
Lars Norén er höfundur verksins en Stefán Jónsson leikstýrir. Þýðing er í höndum Hlínar Agnarsdóttur, Börkur Jónsson hannar leikmynd og Helga I. Stefánsdóttir búninga.
Djöflar verður frumsýnt á Nýja sviði Borgarleikhússins 9. október. Næstu sýningar eru skráðar 15., 18., 24. og 25. október og miðaverð er 8.200 krónur samkvæmt upplýsingum leikhússins.

Fullorðinssirkus, kabarett og brúðuleikhús mætast í Sex Ed, sem verður frumsýnt á Litla sviði Borgarleikhússins 2. október. Sýningin byggir á hugmyndum bandaríska sviðslistahópsins Visceral Abstractions og fær nú íslenskt samhengi með stórum hópi íslenskra og erlendra listamanna.

Frá New York á Litla sviðið

Sex Ed er lýst sem fullorðinssirkus og kynfræðslukarnivali þar sem íslensk kabarettsenan mætir brúðusirkus Visceral Abstractions frá New York. Hópurinn hefur starfað frá árinu 2017 og blandar í verkum sínum saman brúðum, líkama, loftfimleikum, húmor og súrrealískri sviðslist.

Sýningin hefur verið þróuð í nokkrum útgáfum í New York og meðal annars verið sýnd á House of Yes og The Slipper Room. Í íslensku útgáfunni er verkið sett í nýtt samhengi á Litla sviði Borgarleikhússins og lofthæð sviðsins meðal annars nýtt fyrir loftfimleika. Mannslíkaminn, löngun og samskipti eru viðfangsefni sýningarinnar, þar sem fræðslu og skemmtun er blandað saman.

Stór hópur listamanna kemur að sýningunni

Upprunaleg hugmynd er frá Visceral Abstractions og Juanita Cardenas leikstýrir. Margrét Erla Maack er framleiðandi og aðstoðarleikstjóri og Sigurður „Gógó“ Starr er dramatúrg og aðstoðarleikstjóri auk þess að sjá um hljóðmynd.

Meðal flytjenda eru Cheeky Lane, Dana Abrassart, Freyja „Sparkle“ Möller, Jon Joní McDonald, Jón Sigurður Gunnarsson, Juanita Cardenas, Margrét Erla Maack, Ryan Shinji Murray, Sally Cowdin, Róberta Michelle Hall, Sara Magnúsdóttir, Sigurður Gógó Starr og Thomas Burke.

Visceral Abstractions sér um búninga og brúður, Juanita Cardenas og hópurinn um sviðshreyfingar og Jon Joni og hópurinn um danshöfundavinnu. Jóhann Friðrik Ágústsson hannar lýsingu.

Sex Ed er ætlað fullorðnum áhorfendum og Borgarleikhúsið tekur sérstaklega fram að sýningin henti ekki börnum. Frumsýning er 2. október kl. 20 á Litla sviði. Miðaverð er 8.200 krónur samkvæmt upplýsingum leikhússins.

Leikfélag Hveragerðis setur ævintýrasöngleikinn Pílu Pínu á svið í október í tilefni af 80 ára afmæli Hveragerðisbæjar. Ljóð Kristjáns frá Djúpalæk eru hryggjarstykki sýningarinnar en hann bjó á sínum tíma í Hveragerði og tilheyrði því samfélagi skálda og listamanna sem setti svip sinn á bæinn.

Píla Pína segir frá ævintýragjarnri lítilli mús sem á sér þann draum heitastan að geta flogið. Sagan og ævintýri hennar hafa fylgt kynslóðum íslenskra barna og nú fær verkið nýtt líf á sviði hjá Leikfélagi Hveragerðis.

Hryggjarstykki sýningarinnar eru ljóð Kristjáns frá Djúpalæk við tónlist Heiðdísar Norðfjörð og Ragnhildar Gísladóttur. Öll tónlist sýningarinnar hefur verið sett í nýjan búning og Helgi Fr. Georgsson Kemp annast útsetningar. Leikgerðin er eftir Söru Martí Guðmundsdóttur.

Sterk tenging við Hveragerði

Uppsetningin er liður í 80 ára afmæli Hveragerðisbæjar og tengingin við bæinn liggur meðal annars í verkum Kristjáns frá Djúpalæk. Hann bjó í Hveragerði um miðja síðustu öld og var hluti af því öfluga samfélagi skálda og listamanna sem þar varð til.

Gunnar Gunnsteinsson leikstýrir sýningunni. Þetta er þriðja uppsetning hans með Leikfélagi Hveragerðis en áður hefur hann leikstýrt þar Benedikt Búálfi og Ávaxtakörfunni.

Frumsýning þegar uppseld

Píla Pína verður frumsýnd hjá Leikfélagi Hveragerðis miðvikudaginn 7. október kl. 19 og er frumsýningin þegar uppseld samkvæmt miðasölu Tix. Næstu skráðu sýningar eru 14., 17., 18. og 31. október. Miðaverð er frá 4.000 krónum.

Freyvangsleikhúsið frumsýnir gamanleikinn Útsynning eftir Hjálmar Arinbjarnarson 9. október. Verkið gerist á bak við tjöldin hjá áhugaleikfélagi úti á landi og fá áhorfendur að fylgjast með því sem gerist í búningsklefanum á meðan sýning stendur yfir. Jóhanna S. Ingólfsdóttir leikstýrir.

Í Útsynningi er sjónum beint að leikhópi sem er að sýna leikritið Cloud Nine eftir Caryl Churchill. Áhorfendur fá þó ekki að sjá þá sýningu heldur það sem gerist þegar leikararnir koma af sviðinu og safnast saman í búningsklefanum.

Verkið gerist í rauntíma og allur atburðarásin fer fram í klefanum. Þar blandast saman gleði, rifrildi, vinátta og ástir – ásamt hversdagslegri vandamálum á borð við skipulag, þrengsli og skort á klósettpappír. Dýnamíkin breytist svo enn frekar þegar utanaðkomandi aðili birtist og vill hafa áhrif á hvernig hlutunum er háttað.

Fyrsta leikrit Hjálmars í fullri lengd á sviði

Útsynningur er fyrsta leikrit Hjálmars Arinbjarnarsonar í fullri lengd sem sett er á svið. Hann hefur áður skrifað fjölda styttri verka sem hafa ratað á svið, meðal annars í Borgarleikhúsinu, og hefur tekið þátt í áhugaleiklist í rúma þrjá áratugi. Þá hefur hann komið að yfir tuttugu leikverkum hjá Freyvangsleikhúsinu.

Sýningin markar einnig tímamót fyrir Jóhönnu S. Ingólfsdóttur, en þetta er fyrsta leikstjórnarverkefni hennar á verki í fullri lengd. Hún hefur þó bæði skrifað og leikstýrt barnaverkum hjá Freyvangsleikhúsinu undanfarin fjögur ár.

Sýnt í Freyvangi út október

Frumsýning Útsynnings verður í Freyvangi í Eyjafirði föstudaginn 9. október kl. 20. Sýningar eru fyrirhugaðar 9., 10., 16., 17., 30. og 31. október og hefjast þær allar kl. 20. Miðaverð er frá 3.500 krónum.