„Ef þú ætlar að njóta lífsins sem litaður Íslendingur, þá þýðir ekkert að ætla að lifa bara venjulegu lífi.“
Rappari úr Vesturbænum, fyrrum knattspyrnumaður úr Garðabænum og tónlistarmaður úr miðbænum sameina krafta sína í skemmtilegri og hispurslausri sýningu þar sem þeir segja sögur úr eigin lífi.
Á undanförnum árum hefur leikhúslistafólk með fjölbreyttan bakgrunn miðlað sögum sínum með áhrifamiklum hætti í Þjóðleikhúsinu og veitt okkur öllum nýja innsýn inn í hinn margbreytilega veruleika okkar. Má þar nefna sýningar á borð við Góðan daginn faggi, Á rauðu ljósi og Taktu flugið beibí.
„Mig langar að túristar sjái mig og spyrji: Where is Hallgrímskirkja?“
Nú er er komið að þeim Davíð Þór, Jónmundi og Unnsteini að helga sér Stóra sviðið! Þessir þrír listamenn eiga það sameiginlegt að vera rammíslenskir en geta hver um sig rakið uppruna sinn til tveggja heimsálfa. Í þessari einlægu sýningu deila þeir reynslu sinni og sviðsetja sprenghlægileg og grafalvarleg atvik úr eigin lífi sem afhjúpa samfélagið á óvæntan hátt.
Nýtt magnað verðlaunaverk eftir Paulu Vogel, höfund Ökutíma.
Ættmóðirin Phyllis flytur með táningsbörnum sínum, Carl og Mörtu ásamt nokkrum kakkalökkum í nýja íbúð sem vonandi er vistlegri en sú síðasta. Phyllis leggur metnað sinn í að kenna börnunum hvernig þau geti sem best lifað af í hörðum heimi og framfylgir aðferðum sínum af hörku og húmor. Grimm en hlý, óbilgjörn en samkvæm sjálfri sér tekst Phyllis á við raunveruleikann með ginflösku og sígarettur að vopni. En börn verða fullorðin og finna sínar eigin leiðir í lífi sem ber með sér nýjar og óvæntar áskoranir.
Sigrún Edda Bjönsdóttir segir hér stuttlega frá verkinu þar sem hún leikur aðalhlutverkið.
Höfundurinn Paula Vogel er Íslendingum að góðu kunn en verk hennar, Ökutímar, sló í gegn hér fyrir nokkrum árum. Hún er eitt vinsælasta og virtasta leikskáld Bandaríkjanna og hefur unnið til óteljandi viðurkenninga – en sagt hefur verið um hana að hún safni verðlaunum eins og svartur sófi safnar ryki. Mömmó eða Motherplay er nýjasta verk hennar, frá 2024 og var það tilnefnt til allra hugsanlegra leiklistarverðlauna bandaríkjanna á síðasta ári. Leikritið er að hluta til sjálfsævisögulegt en Vogel byggir það á sambandi sínu við móður sína og bróður.
Síðasta partýið í blokkinni hefur verið haldið hjá Leikfélagi Kópavogs.
Síðasta partýið í blokkinni hefur verið haldið. Íbúarnir eru missáttir við þá ákvörðun og upp hefst leynimakk sem fljótlega fer úr böndunum.
En hver er ástæðan fyrir því að það verða ekki fleiri partý? Er það brotni sófinn, bilaði glugginn á baðherberginu eða merkingarnar á póstkössunum? Eða er það dularfulli fornleifafræðingurinn? Og hvaðan kom þessi frjósemisstytta?
Inn í atburðarásina dragast húsverðir, dyraverðir, stílistar, kaffibaristur, kaupglaðar konur og aðrir virkir og óvirkir partýpinnar sem öll eiga það sameiginlegt að vera í leit að hamingjunni í einhverju formi.
…glettið, spaugsamt og sprækt leikrit.
Síðasta partýið er nýr gamanleikur eftir Aðalstein Jóhannsson í leikstjórn Gísla Björns Heimissonar
Leikendur: Birta Rut Tiasha Sigfúsdóttir Lilja Sigurðardóttir Sigurbjörg Halldórsdóttir Sigurður Kr. Sigurðsson Aðalsteinn Jóhannsson Bjarklind Þór Davíð Máni Stefánsson
Leikfélag Keflavíkur sýnir We Will Rock You í Frumleikhúsinu.
We Will Rock You er kraftmikill söngleikur sem fjallar um frelsi, sjálfsmynd, uppreisn og umbreytandi mátt tónlistar. Verkið er byggt á lögum bresku rokkhljómsveitarinnar Queen og var frumsýnt í London árið 2002. Handritið er eftir Ben Elton og var unnið í samstarfi við Brian May og Roger Taylor úr Queen. Söngleikurinn er ekki ævisaga sveitarinnar heldur framsækin og húmorísk vísindaskáldsaga þar sem tónlist Queen myndar grunninn að nýrri og sjálfstæðri sögu.
Sagan gerist í fjarlægri framtíð á jörðinni sem hefur fengið nafnið iPLANET. Samfélagið er orðið einsleitt og stjórnað af stórfyrirtækinu Globalsoft, sem ræður öllu undir forystu hinnar valdamiklu Killer Queen. Í þessum heimi hefur tónlist, hljóðfæraleikur, sköpun og sjálfstæð hugsun verið bönnuð. Það eina sem má heyrast er yfirborðskennt popp sem Globalsoft framleiðir sjálft.
Undir niðri kraumar þó andspyrna. Ungi maðurinn Galíleó Fígaró á erfitt með að aðlagast þessari vélrænu veröld. Hann heyrir tónlist úr fortíðinni sem enginn annar virðist skynja og í draumum hans birtast brot úr gömlum laglínum og textum sem hann óvart slettir inn í samtöl sín. Á leið sinni hittir hann Scaramouche, stúlku sem líkt og hann stendur utan við kerfið. Saman ganga þau til liðs við Bóhemana – hóp sem heldur í vonina um gamla menningu, tónlist og frelsi. Þau leggja af stað í ferðalag til að finna týnt hljóðfæri og frelsa heiminn úr greipum Killer Queen og veldis Globalsoft.
Leikstjóri: Kristín Lea Sigríðardóttir
Danshöfundur: Helga Ásta Ólafsdóttir
Tónlistarstjóri: Sigurður Smári Hansson
Athugið: Í sýningunni er notast við strobe-lýsingu sem getur haft áhrif á viðkvæma áhorfendur.
Fögur eiginkona, tvær ungar og óstýrilátar dætur, aðþrengd mágkona, gráðug tengdamamma, dularfull ráðskona og kynþokkafull þjónustustúlka. Húsbóndinn sjálfur liggur sofandi í rúmi sínu uppi á lofti. Eða hvað? Þegar sjö villtar konur eru samankomnar og sú áttunda bætist í hópinn getur allt gerst! Glæpsamlegur gamanleikur með söngvum og dansi!
Leikhópurinn Lotta verður á faraldsfæti í sumar með nýja sýningu sem nefnis Litaland.
Leikhópurinn Lotta vinnur nú að undirbúningi fyrir annasamt sumartímabil þar sem hópurinn hyggst ferðast um landið með sýningar fyrir fjölbreyttan hóp áhorfenda. Bókanir fyrir sumarið eru þegar farnar að streyma inn, en hópurinn býður upp á leikhúsverkefni fyrir fyrirtæki, félagasamtök, bæjarhátíðir, skóla og leikskóla.
Helsta nýjung sumarsins er fjölskyldusöngleikurinn Litaland, sem verður frumsýndur á Lottutúni í Elliðaárdal 3. júní. Verkið var upphaflega sett upp fyrir tíu árum og hefur verið vinsælt meðal áhorfenda, en það er jafnframt eina sýning hópsins sem ekki byggir á þekktu ævintýri.
Sýningin er tæplega klukkustund að lengd og fer fram utandyra. Aðstandendur hvetja gesti til að taka með sér teppi og nesti, en markmiðið er að skapa sameiginlega fjölskyldustund þar sem bæði börn og fullorðnir geta notið leikhússins saman. Hægt verður að bóka sýninguna fyrir viðburði víða um land yfir sumarmánuðina.
Auk Litalands býður Leikhópurinn Lotta upp á svokallaða söngvasyrpu, 20 mínútna skemmtiatriði þar sem tvær persónur úr Ævintýraskógi Lottu flytja brot af vinsælum lögum og atriðum úr sýningum hópsins. Atriðið er hannað til að henta jafnt innandyra sem utandyra og er í boði allt árið um kring.
Leikhópurinn tekur einnig að sér að kynna dagskrár á hátíðum og stýra skemmtiatriðum á borð við bingó og leikjum. Að sögn hópsins er hægt að sníða verkefni að þörfum hvers viðburðar.
Sýningar á Skilaboðaskjóðunni hefjast 27. febrúar hjá Leikfélagi Selfoss.
Leikfélag Selfoss sýnir Skilaboðaskjóðuna eftir Þorvald Þorsteinsson í leikstjórn Gunnars Inga Gunnsteinssonar. Frumsýnt verður 27. febrúar og verða sýningar um helgar í mars og apríl í Litla leikhúsinu við Sigtún.
Í Skilaboðaskjóðunni segir frá Putta og Möddumömmu sem búa í Ævintýraskóginum, þar sem öll ævintýrin gerast og dvergarnir sinna mikilvægum störfum. Þegar Nátttröllið rænir Putta til að breyta honum í tröllastrák, sameinast allir íbúar skógarins um að bjarga honum áður en sólin sest á bakvið sólarlagsfjall. En nornin, úlfurinn og stjúpan vilja ekki vera með og þá eru góð ráð dýr.
Skilaboðaskjóðan er ævintýrasöngleikur byggður á samnefndri bók Þorvaldar sem kom út árið 1986 og naut mikilla vinsælda. Söngleikurinn var frumsýndur á stóra sviði Þjóðleikhússins í nóvember árið 1993 í leikstjórn Kolbrúnar Halldórsdóttur og sló í gegn. Jóhann G. Jóhannsson, tónlistarstjóri Þjóðleikhússins, samdi tónlist fyrir verkið við texta Þorvaldar og vorið 1994 kom út geisladiskur með tónlistinni í flutningi leikara og hljómsveitar leikhússins.
Skilaboðaskjóðan er ævintýri fyrir börn á öllum aldri (5-103 ára) og við hlökkum til að sjá ykkur öll í Litla leikhúsinu við Sigtún.
Heilsugæslan – hápólitískur gamanleikur sem sýndur verður í Tjarnarbíó.
Heilsugæslan er hápólitískur gamanleikur eftir lækni þar sem tveir leikarar, Elfar Logi og Rakel Björk Björnsdóttir, bregða sér í öll hlutverk hvort heldur það eru læknar eða viðskiptavinir, mishressir sjúklingar. Fáir hafa enga skoðun á heilbrigðiskerfinu. Margir telja það bákn en enginn vill þó án þess vera. Heilsugæslan er fyrsti viðkomustaðurinn, þar hefjast hlutirnir, leysast, velkjast eða flækjast.
Freyvangsleikhúsið frumsýnir í febrúar bráðfyndna gamanleikinn Tom, Dick og Harry eftir Ray Cooney og son hans Michael Cooney, í íslenskri þýðingu Harðar Sigurðarsonar. Leikstjórn er í höndum Ólafs Jens Sigurðssonar.
Sýningin verður frumsýnd 20. febrúar og verður á dagskrá um helgar fram í apríl.
Verkið fjallar um hjónin Tom og Lindu sem bíða eftir heimsókn frá fulltrúa ættleiðingarskrifstofu. Bræður Toms, þeir Dick og Harry, eru hins vegar ekki beint þekktir fyrir yfirvegun og skynsemi og koma sífellt með misgáfuleg ráðabrugg í þeirri viðleitni að „einfalda“ lífið – bæði fyrir sig sjálfa og hjónin. Þegar fleiri persónur bætast í hópinn flækjast málin enn frekar og atburðarásin fer smám saman úr böndunum. Það má því segja að allt gangi ekki alveg samkvæmt áætlun, sérstaklega ekki fyrir Tom – og síður en svo fyrir Lindu.
Þrek og tár var frumsýnt 13. febrúar sl. hjá leikdeild Umf.
Söngleikurinn Þrek og tár, eitt vinsælasta verk Ólafs Hauks Símonarsonar, verður settur á svið hjá leikdeild Umf. Eflingar á Breiðumýri í vetur. Leikstjórn er í höndum Maríu Pálsdóttur og Pétur Ingólfsson sér um tónlistarstjórn.
Verkið segir frá lífi söngelskra kaupmannafjölskyldu í Vesturbænum á sjöunda áratug síðustu aldar. Áhorfendur kynnast þremur kynslóðum fjölskyldunnar, en saga sonarins Davíðs liggur sem rauður þráður í gegnum sýninguna. Inn í frásögnina fléttast mörg þekkt lög frá þessum tíma, meðal annars titillagið Þrek og tár, Í rökkurró og fleiri perlur. Þótt tónlistin sé heillandi er lífið ekki alltaf dans á rósum og takast persónurnar á við ýmis siðferðileg álitamál.
Frumsýnt verður föstudaginn 13. febrúar klukkan 20 í Félagsheimilinu á Breiðumýri í Reykjadal. Fyrir sýningu og í hléi verður notaleg kaffihúsastemning að hætti Kvenfélags Reykdæla, eins og jafnan áður.
