Leikhópurinn Lotta fagnar 20 ára afmæli með endurkomu Litalands
Leikhópurinn Lotta heldur upp á 20 ára afmæli sitt í sumar með nýrri uppfærslu á söngleiknum Litaland, sem verður sýndur víða um land á komandi mánuðum. Verkið, sem fyrst var sett á svið árið 2016, skipar sérstakan sess í sögu hópsins enda er það eina af stærri sumarsýningum hans sem byggir ekki á klassísku ævintýri heldur er frumsamið verk
Litaland segir sögu Gulverja, Rauðingja og Bláunga sem búa hver í sínum heimi þar sem samskipti milli litanna eru lítil. Þegar Bláungar neyðast til að yfirgefa heimkynni sín og leita skjóls hjá Gulverjum hefst atburðarás sem reynir á fordóma, samstöðu og skilning íbúa Litalands. Á sama tíma ríkir eftirvænting í Rauðheimum þar sem nýr litur er væntanlegur í heiminn, þó ýmislegt virðist hulið leyndardómi.
Verkið er eftir Önnu Bergljótu Thorarensen og sameinar söng, dans og gaman í fjölskyldusýningu sem höfðar jafnt til barna sem fullorðinna. Leikstjórn er í höndum Sigsteins Sigurbergssonar og Þórunnar Lárusdóttur og í leikhópnum eru meðal annars Andrea Ösp Karlsdóttir, Anna Bergljót Thorarensen, Rósa Ásgeirsdóttir, Stefán Benedikt Vilhelmsson og Sumarliði V. Snæland Ingimarsson.
Líkt og fyrri sumarsýningar Leikhópsins Lottu fer Litaland fram utandyra og er um klukkustund að lengd. Að sýningu lokinni gefst áhorfendum kostur á að hitta persónur verksins og taka myndir með þeim, en slík nálægð við áhorfendur hefur um árabil verið eitt af einkennum starfsemi hópsins
Leikhópurinn Lotta var stofnaður árið 2006 og hefur síðan ferðast um landið með fjölskyldusýningar sem hafa orðið fastur liður í sumardagskrá fjölmargra sveitarfélaga. Með endurkomu Litalands á afmælisári hópsins fá bæði nýir og eldri áhorfendur tækifæri til að kynnast einu af eftirminnilegustu verkum hans á ný.
