Hrakhólar 12

Halaleikhópurinn frumsýnir nýtt íslenskt leikrit sem meðlimir Halaleikhópsins hafa skapað saman undir leiðsögn Rúnars Guðbrandssonar leikstjóra og Kolbrúnar Daggar Kristjánsdóttur, sviðshöfundar.

Persónudrifin satíra með alvarlegum undirtón

Verkið fjallar um íbúa fjölbýlishúss, ættingja þeirra og aðra óboðna gesti sem rápa inn og út, í óþökk Söndru umsjónarmanns fasteigna. Þegar Helena listakona flytur inn á móður sína tímabundið, bankar fortíðin upp á, – og nágrannar sem vantar ýmist egg eða leiðsögn í lífinu. Helena hefur lifað, upplifað, brunnið út og risið upp. Hún er eins og fuglinn Fönix, nema með betri húmor en verri svefn. Mun sveitastjórnin á Þórðarhöfn samþykka hugmynd hennar eða ætla þau að missa ferðamennina úr greipum sér? Hvað gerist þegar Sandra tilkynnir á húsfundi um ástand hússins og hvað verður um Ástu sem er alltaf að bíða en fær engan frið fyrir Hallgerði stundakennara með jógadýnu sem hefur lifað af fjögur krabbamein, ADHD og samband við fótboltamann. Nú eða Borghildi hjá Neytendasamtökunum sem vill hjálpa Sjonna bróður sínum, en hann vill enga hjálp og er í nöp við Silju sem er svo aumingjagóð og hleypir öllum inn, líka trúboðanum sem vill vísa íbúum leiðina heim, í gegnum dimman dal, óttist ei, þótt vasaljósið sé bilað.

Miðasala hjá Halaleikhópnum
Miðaverð: 3500kr
Lengd: 2 tímar með hléi
Hátún 12 – inngangur 3
27. apríl – frumsýning
30. apríl
3. maí
10. maí