Þjóðleikhúsið frumsýnir Ör

Þjóðleikhúsið frumsýnir nýtt Íslensk verk fimmtudaginn 19. September.
Verkið er eftir Auði Övu Ólafsdóttur og leikstjóri er Ólafur Egill Egilsson.

Verkið fjallar um Jónas Ebeneser, fráskilinn karlmann á miðjum aldri sem fær að vita að uppkomin dóttir hans, Vatnalilja, er í raun barn annars manns. Vængbrotinn og í djúpri tilvistarkreppu reynir Jónas að átta sig á hlutverki sínu í þessum heimi og skilja konur, rétt eins og Svanur, nágranni hans og kórfélagi. Í lífi Jónasar eru þrjár konur; Stella móðir hans sem dvelur á dvalarheimili og er gagntekin af tölfræði stríða, líffræðingurinn Vatnalilja sem er sérfræðingur í súrnun sjávar og innflytjandinn Maí sem starfar á dvalarheimilinu og tekst á við fortíð í stríðshrjáðu landi. En konur geta verið flóknar og margt sem þær varðar sannkölluð ráðgáta. Eða hvað á kona við þegar hún segir við karlmann að hann rekist utan í sjóndeildarhring hennar?
Leikritið ÖR (eða Maðurinn er eina dýrið sem grætur) er í senn órætt, fyndið og ágengt, og spyr áleitinna spurninga um lífið og dauðann, samskipti kynjanna og leit að samastað í veröldinni.
Athygli er vakinn á því að boðið verður upp á 20 mín. umræður eftir 6. sýningu sunnudagskvöldið 6. Október.

Með helstu hlutverk fara: Baldur Trausti Hreinsson, Guðrún S. Gísladóttir, Birgitta Birgisdóttir, Pálmi Gestsson og Hildur Vala Baldursdóttir