Browsing "Uncategorized"
Vinnslan #10 verður haldin þann 9. apríl í Tjarnarbíó!
Þetta verður sannkölluð listahátíð en um 30 listamenn og hópar sýna verk sín í vinnslu fyrir áhorfendur.
Vinnslan mun fylla leikhúsið af myndlist, lifandi tónlist, gjörningum, dansi, leikhúsverkum, videólist og fleiru!
Þau enda svo kvöldið með tónleikum og þá er tilvalið að dansa af sér veturinn!
Komdu og upplifðu það ferskasta sem er að gerast í listum í dag!
Dagskrá frá kl: 19:30-23:00
Húsið og barinn opna klukkustund áður en viðburður hefst.
Miðaverð er 2000 kr. og miðasala fer fram á Miði.is.
vinnslan.com
Glænýtt verk eftir þekktasta samtímaleikskáld Svía, bráðfyndið og harkalegt í senn.
Sýningin er sýnd í Kassanum í Þjóðleikhúsinu.
Hvað færðu há laun fyrir vinnu þína? Í þágu hvers ertu að vinna? Í þessu nýja verki kynnumst við fjölskrúðugum hópi fólks þar sem hver og einn glímir við markaðslögmálin með sínum hætti.
Margrét lætur sig dreyma um að sleppa út úr hagkerfinu, Máni vill rústa því. Andrej vill fá vinnu, Freyja vill hefnd. Þau fjárfesta í frímerkjum og furuhnetum, draumórum og ilmvötnum, barnavögnum og hugsjónum.
Hvernig hefur hagkerfið sem við lifum í áhrif á okkur, á það hvernig við horfum á hlutina, hvernig við notum tungumálið, hvernig við beitum líkama okkar?
≈ [um það bil] eftir Jonas Hassen Khemiri er í senn bráðfyndið og ágengt verk þar sem er leitast við að veita áhorfendum sem fjárfest hafa í leikhúsupplifun kvöldsins hæsta mögulega skemmtunarvirði á hvern keyptan miða. Hvað þarf raunverulega til, til þess að leikrit sé miðaverðsins virði?
Verkið var frumsýnt á Dramaten í Stokkhólmi á liðnu hausti og hefur notið gífurlegra vinsælda í Svíþjóð.
Hægt er að kaupa miða hér: https://midi.is/kaupamidas=%252fImKipYAVizBNYV%252fsPXL6fu9mLkFJ95k%252brtP4lqB2G2Xv8byFiAZo
Borgarleikhúsið leitar nú að 22 börnum til að fara með hlutverk í Sögunni af bláa hnettinum eftir Andra Snæ Magnason. Verkið verður fyrsta uppfærsla næsta leikárs og leikstýrt af Bergi Þór Ingólfssyni sem jafnframt semur leikgerð en tónlistin verður í höndum Kristjönu Stefánsdóttur. Æfingar hefjast í maí en áætluð frumsýning er 17.september.
Leitað er að börnum sem geta sungið, dansað og leikið, að því er fram kemur í tilkynningu frá leikhúsinu. Öllum krökkum á aldrinum átta til fjórtán ára er boðið að taka þátt í prufunum sem fara fram dagana 7. Til 15. apríl. Skráning fer fram í Borgarleikhúsinu miðvikudaginn 6. apríl klukkan 16.
Sagan af Bláa hnettinum eftir Andra Snæ hefur komið út á 12 tungumálum og hlaut íslensku bókmenntaverðlaunin árið 1999, Janusz Korczak honorary award 2000 og Vestnorrænu Barnabókaverðlaunin 2001. Hún segir frá bláum hnetti lengst úti í geimnum þar sem búa hálfgerð villibörn sem fullorðnast ekki.
Eitt kvöldið þegar Brimir og Hulda eru stödd í Svörtufjöru birtist stjarna á himni sem stefnir beint á þau. Stjarnan lendir í fjörunni með mikilli sprengingu en í reyknum mótar fyrir skuggalegri veru sem starir út í myrkrið. Þá hefst hættulegt ævintýri sem leiðir börnin um myrka skóga, djúpa dali og loftin blá. Reynir þá sem aldrei fyrr á vináttu og ráðsnilld barnanna á bláa hnettinum.”
Stúdentaleikhúsið kynnir:
Spennið beltin, læsið mæður ykkar inni og haldið ykkur fast því að Stúdentaleikhúsið ætlar yfir strikið.
Við ætlum að segja allt sem má ekki segja. Allt sem ykkur langar til að sjá og heyra.
Við bjóðum upp á söng, dans, show og gulan glamúr. Bara aðeins of mikið af öllu.
Miðapantanir á studentaleikhusid@gmail.com
Yfir strikið er leikstýrt af Ólafi S. K. Þorvaldz og er leikrit um fordóma án fordóma.
Sýningar:
Föstudaginn 15. apríl – FRUMSÝNING – UPPSELT
Laugardaginn 16. apríl kl. 20:00 og 22:00
Fimmtudaginn21. apríl kl. 20:00
Föstudaginn 22. apríl kl. 20:00
Laugardaginn 23. apríl kl. 20:00 og 22:00
Miðvikudaginn 27. apríl kl. 20:00
Fimmtudaginn 28. apríl kl. 20:00
Laugardaginn 30. apríl kl. 20:00
Sýnt í Gömlu Kartöflugeymslunum við Rafstöðvarveg. Kartöflugeymslurnar sjást á hægri hönd þegar ekið er upp Ártúnsbrekkuna.
Hystory – Sýnt í Hofi á Akureyri 1. og 2 apríl.
ÞRJÁR VINKONUR SEM ERU EKKI VINIR Á FACEBOOK HITTAST OG DREKKA LANDA.
Dagný, Begga og Lilja voru bestu vinkonur í grunnskóla. Þegar þær voru fimmtán ára hættu þær að tala saman. Síðan eru liðin tuttugu ár.
Þær mætast stundum á förnum vegi: í Melabúðinni, á Ægisíðunni eða í ræktinni úti á Nesi. Þær brosa, kinka kolli, segja: Sæææl … en hendurnar dofna og þær verkjar í hjartað. Dagnýju finnst kominn tími til að þær hittist svo hún sendir þeim skilaboð á Facebook og býður þeim heim til sín í kaffi. Hana langar til að hreinsa andrúmsloftið en Beggu finnst ekki vera hægt að laga til í minningum annarra og Lilja man ekki neitt.
Kristín Eiríksdóttir er myndlistarmenntaður rithöfundur. Fyrsta bókin hennar, Kjötbærinn, kom út árið 2004. Á eftir fylgdu svo ljóðabækurnar Húðlit auðnin (2006) og Annarskonar sæla (2008). Árið 2010 kom út smásagnasafnið Doris deyr og haustið 2012 sendi hún frá sér sína fyrstu skáldsögu, Hvítfeld – fjölskyldusaga. Hún hefur einnig skrifað tvö leikrit: Karma fyrir fugla ásamt Kari Ósk Grétudóttur, sem frumsýnt var í Þjóðleikhúsinu í febrúar 2013 og Skríddu sem sett var upp í Borgarleikhúsinu í apríl 2013.
Selma og Alex hafa ekki hist í fimm ár. Fyrir tilviljun hittast þau aftur og þurfa þá að gera upp drauga fortíðar, ákveða hvort þau séu tilbúin til að axla ábyrgð á gjörðum sínum og fyrirgefa.
Smám saman raðast saman sú atburðarrás sem varð til þess að þau slitu sambandi og er ástæða þess að þau eiga erfitt með að halda áfram með líf sitt. Er hægt að fyrirgefa þeim sem þú elskar glæp sem framinn er í gáleysi?
„Það er erfitt að hata einhvern þegar þú þarft mest á honum að halda.“
Djúp spor er nýtt heimildarverk um baráttuna við ástina, áföll og fyrirgefninguna. Verkið er unnið út frá viðtölum við einstaklinga sem þekkja afleiðingar ölvunaraksturs af eigin raun. Við horfum á báðar hliðar málsins, þar sem við kynnumst bæði gerandanum og aðstandanda fórnarlambsins.
Verkið er unnið og leikið af Jennýju Láru Arnórsdóttur og Jóel Sæmundssyni. Byggir það á raunverulegum atburðum, en Jenný Lára hefur áður unnið verkið Elska með þessari aðferð. Elska var unnið upp úr viðtölum varðandi hugmyndir fólks um ástina og sambönd. Það var sýnt víða á norðurlandi, í Reykjavík og á Act Alone leiklistarhátíðinni og hlaut góðar viðtökur.
Leikstjóri er Bjartmar Þórðarson en hann hefur komið víða við sem leikstjóri, dramatúrg og leikari, nú síðast með eigin verki, Gripahúsinu, í Tjarnarbíói og í 90(210) Garðabæ í Kassa Þjóðleikhússins. Jóel hefur aðallega verið að vinna við sjónvarpsþætti og kvikmyndir undanfarið en síðast þýddi hann og setti upp Glerlaufin sem sýnt var í Norðurpólnum á Seltjarnarnesi.
AÐSTANDENDUR
Höfundar: Jenný Lára Arnórsdóttir og Jóel Sæmundsson
Leikstjóri: Bjartmar Þórðarson
Leikarar: Jenný Lára Arnórsdóttir og Jóel Sæmundsson
Búningar: Sandra Hrafnhildur Harðardóttir
Tónlist og hljóð: Mark Eldred
Ljós: Arnar Ingvarsson
Markaðssetning: Jenný Lára Arnórsdóttir, Katla Rut Pétursdóttir og Þórunn Guðlaugsdóttir
Grafískur hönnuður: Sigurður Hólm
SÝNINGARDAGAR
31. mars, 20:30
3. apríl, 20:30
10. apríl, 21:00
15. apríl. 20:30
24. apríl, 20:30
Verkefnið er styrkt af Minningarsjóð Lovísu
Píkusögur, eftir bandaríska leikskáldið Eve Ensler, hefur verið kallað mikilvægasta og pólitískasta leikverk síðari ára. Óhætt er að segja að það hafi hreyft við áhorfendum þegar það var frumsýnt árið 1996. Verkið samanstendur af einræðum kvenna sem allar hafa sögur að segja um píkur, ýmist sínar eigin eða annarra kvenna píkur. Sumar skoplegar og stundum drepfyndnar. Aðrar nístandi dramatískar og sorglegar.
Eftir velgengni leikverksins stofnaði höfundurinn Eve Ensler, ásamt fleirum, V-dags samtökin sem hafa það að markamiði að vinna gegn ofbeldi á konum.
Næsta sýning er sýnd í Gamla Bíói þann 4. apríl næstkomandi. Allur ágóði af þessar uppsetningu af Píkusögum mun renna til Kvennaathvarfsins.
Píka er líkamshlutinn sem við nefnum sjaldnast upphátt og helst ekki sínu rétta nafni. Hvers vegna ekki að byrja núna?
Eldfjörug fjölskyldusýning, uppfull af leikhústöfrum í anda Vesturports!
Gleymdu öllu því sem þú þykist vita um Hróa hött! – Hér er goðsögunni um þennan fræga útlaga snúið á hvolf í magnaðri nýrri leiksýningu, sem hefur nú þegar slegið í gegn beggja vegna Atlantshafsins.
Í þessari sýningu úr smiðju Vesturports, Þjóðleikhússins og Royal Shakespeare Company ræna Hrói höttur og hinir miskunnarlausu liðsmenn hans hvern þann sem vogar sér inn í Skírisskóg, án þess að gefa nokkuð til hinna fátæku. Hér er það hin hugrakka Maríanna sem þarf að berjast fyrir réttlætinu og takast á við hin myrku öfl, en Jóhann prins þjakar almenning með ofbeldi og nýjum og hærri sköttum, og ætlar sér að leggja allt ríkið undir sig. Hrói getur lært sitthvað af Maríönnu um hvað það er að vera raunveruleg hetja, því án hennar verður landinu steypt í glötun.
Það er glæsilegur leikhópur sem kemur saman í þessari ævintýrasýningu í Þjóðleikhúsinu. Tónlistarkonan Salka Sól Eyfeld, sem hlaut nýverið Íslensku tónlistarverðlaunin, hefur samið nýja tónlist fyrir sýninguna og flytur hana ásamt hljómsveit á sviðinu.
Rómantískt, hættulegt og drungalegt. Og ekki síst… skemmtilegt!
Improv Ísland er með vikulegar grínsýningar í Þjóðleikhúskjallaranum á miðvikudögum.
Hver sýning er spunnin á staðnum út frá einu orði úr sal og ekkert er ákveðið fyrirfram. Nýtt leiklistarform í senunni hér á landi.
Improv Íslands er nýr leikhópur sem sérhæfir sig í langspuna. Hver sýning er spunninn á staðnum út frá einu orði áhorfenda. Ekkert er ákveðið fyrirfram, ekkert handrit er að sýningunum og er því hver sýning frumsýning og lokasýning. Improv Ísland getur lofað áhorfendum því að sama hversu oft þeir koma, þeir munu aldrei sjá sömu sýninguna. Miðinn kostar líka einungis 1500 kr. svo líklega er um að ræða ódýrustu leikhússýningu landsins.
Langspuni er mjög vinsæll víða um heim þá sérstaklega í Bandaríkjunum. Margir af frægustu gamanleikurum Bandaríkjanna koma úr spunasenunni og má sem dæmi nefna Tinu Fey, Will Ferrell, Steve Carrell, Amy Poehler og Aziz Ansari.
Improv Ísland er rétt rúmlega eins árs gamalt en tók þátt í Del Close spunamaraþoninu í New York í júní sl. Þar sýna allir helstu spunahópar heims spunasýningar viðstöðulaust í þrjá sólahringa. Síðustu tvær Menningarnætur hefur hópurinn staðið fyrir spunamaraþoni í Þjóðleikhúskjallaranum. Í bæði skiptin komust mun færri að en vildu. Improv Ísland hefur einnig flutt inn nokkra af stærstu kennurum og leikurum spunasenunnar í Bandaríkjunum. Á frumsýningunni 3. febrúar munu Suzi Barrett og Rebecca Drysdale sýna með hópnum en þær munu einnig halda námskeið fyrir lengra koman í kringum heimsókn sína. Báðar sýna þær í UCB leikhúsinu í New York en Rebecca Drysdale er einnig handritshöfundur í gamanþáttunum Key and Peele.
Dóra Jóhannsdóttir leikkona er stofnandi langspunasenunar hérlendis. Hún hefur lært langspuna í hinu þekkta UCB leikhúsi síðastliðin 3 ár og komið reglulega til Íslands til að kenna námskeið. Síðan þá hafa um 300 manns sótt námskeið á vegum Improv Íslands undir leiðsögn Dóru. Leikhópur Improv Ísland samanstendur svo af 20 spunaleikurum úr öllum áttum og sýnir hópurinn nokkur mismunandi form spunans, m.a. söngleikjaspuna þar sem heill söngleikur er spunninn á staðnum með píanóleikaranum Karli Olgeirssyni.
Sýningar verða alla miðvikudaga í Þjóðleikhúskjallaranum og hefjast kl. 19:30 Miðasala fer fram á midi.is, leikhusid.is og í síma 551 1200.
Föstudaginn 1.apríl kl 20 frumsýnir Borgarleikhúsið í samstarfi við Ásrúnu Magnúsdóttur, Aude Busson og Alexander Roberts nýtt og nærgöngult verk með krökkum í öllum hlutverkum.
Saman á sviðinu standa tíu börn á aldrinum átta til tólf ára sem hafa verið skilin eftir í heimi sem þau bjuggu ekki til. Þau taka yfir sviðið og eyða tíma saman, dansa, spila tónlist og tala við hvort annað. Börnin mæta heimi fullum af melankólíu, svartsýni, rómantík og ruglingi sem þau hafa erft en báðu aldrei um.
Made in Children er á mörkum mikils vonleysis og öfgafullrar bjartsýni og er börnunum gefinn laus taumur og þau send af stað í leit að háleitu siðferði, djúpstæðum innri frið og betri framtíð.
Aðstandendur Höfundar & leikstjórar: Ásrún Magnúsdóttir, Aude Busson og Alexander Roberts| Leikmynd: Guðný Hrund Sigurðardóttir | Tónlist: Borko |Hljóð: Baldvin Þór Magnússon | Leikarar: Matthildur Björnsdóttir, Herdís Sigurðardóttir, Jörundur Orrason, Flóki Dagsson, Ylfa Aino Eldon Aradóttir, Margrét Vilhelmína Nikulásardóttir, Freyja Sól Francisco Heldersdóttir, Kolbeinn Orfeus Eiríksson, Kolbeinn Einarsson og Óðinn Sastre Freysson.
