Hellisbúinn er líklega vinsælasti einleikur heims. Hellisbúinn hefur þegar verið sýndur í 52 löndum, yfir 1000 borgum og frá upphafi hafa tugir milljóna um allan heim séð Hellisbúann.

Hellisbúinn snýr nú aftur til Íslands í þriðja sinn en sýningin er líklega mest selda leiksýning landsins. Yfir 105 þúsund Íslendingar hafa hlegið, grátið, og fengið ódýra hjónabandsráðgjöf hjá Hellisbúanum.

Jóel Sæmundsson túlkar hinn gifta meðalmann að þessu sinni, en Jóel er sjálfur einn fyndnasti maður sem hann þekkir, að eigin sögn.

Hellisbúinn er frásögn af lífinu sjálfu, hjónabandi, ástum og ósætti. Hellisbúinn útskýrir sína sýn á samlífið og samskipti kynjanna. Konur og karlar, og allir hinir, sem hafa einhvern tímann verið í sambandi, eru í sambandi eða langar í samband, geta skemmt sér vel og samsamað sig við sögur Hellisbúans.

Hellisbúinn hefur þróast mikið síðan hann bankaði síðast uppá á Íslandi og er nú orðinn þrælkunnugur hinum ýmsu öppum.

Hellisbúinn verður frumsýndur í Bæjarbíó, Hafnarfirði þann 7. september. Sýningar fara svo fram í Bæjarbíói og Gamla Bíó, Reykjavík.

Leikfélag Hafnarfjarðar sýndi leikritið Ubba kóng dagana 29. og 30. ágúst sl. í Théâtre Princesse Grace í Mónakó á hinni virtu alþjóðlegu leiklistarhátíð Mondial du Théâtre.

Hátíðin er haldin í Mónakó fjórða hvert ár á vegum AITA/IATA, International Association of Amateur Theatre, og Studio de Monaco og þykir mikill heiður að vera boðin þátttaka í henni. 24 leikhópum er boðið að taka þátt hverju sinni og er þetta í þriðja sinn sem íslenskur leikhópur er valinn til þess að sýna á hátíðinni, sem fagnaði 60 ára afmæli sínu að þessu sinni.

Leikfélag Hafnarfjarðar frumsýndi Ubba kóng eftir Alfred Jarry í leikstjórn Ágústu Skúladóttur vorið 2015 og er þetta í annað sinn sem farið er út fyrir landsteinana með verkið. Leikarar eru 10 alls, tónlistin í verkinu er eftir Eyvind Karlsson og textar eftir Karl Ágúst Úlfsson og Þórarin Eldjárn.

Ubba kóngi var tekið með kostum og kynjum og hlaust sýningunni m.a. sá heiður að vera lokasýning hátíðarinnar.  Í dómi gagnrýnanda hátíðarinnar segir m.a. að leikstjórn Ágústu hafi verið einstaklega frumleg og margar kómískar lausnir nýttar til að skapa hughrif fyrir áhorfendur.  Íslenski hópurinn hafi komið skilaboðum höfundar um fáránleika forréttindastéttarinnar fullkomlega á framfæri ásamt því að setja sinn eigin lit á sýninguna með þeirri blöndu af örlæti og bilun sem einkennir íslenska þjóð.  Leikhópnum er þakkað það hugrekki að setja Ubba kóng upp á þennan óhefðbundna hátt, í anda hins upprunalega verks.  Það sé vegna sýninga sem þessarar sem Mondial leiklistarhátíðin sé til auk þess sem slíkar sýningar viðhaldi þeirri sérstöðu áhugaleikhússins fram yfir atvinnuleikhús að koma sífellt á óvart.

Leikfélag Hafnarfjarðar nýtti hvert tækifæri á hátíðinni til þess að kynna bakgrunn sinn og menningu, m.a. í pallborðsumræðum. Á kynningarkvöldi var sungið fyrir gesti og þeir þjálfaðir í víkingaklappi, auk þess sem boðið var upp á brennivín, harðfisk með smjöri og íslenskan lakkrís.  Hópurinn bar þar að auki gjafir af ýmsu tagi til Mónakó og hefur vitinn í Hafnarfirði nú dreifst út um allan heim í barmi annarra þátttakenda.

Leiklistarskólinn Opnar dyr hefur verið starfandi í rúm 9 ár og fjöldi manns hefur komið á námskeið og líst því yfir á eftir að námskeiðið hafi hjálpað þeim bæði persónulega og í starfi. „Stórkostleg upplifun & frábær skemmtun – Frábært að fá að gera eitthvað algjörlega nýtt, krefjandi og skapandi“ er meðal annars það sem nemendur hafa sagt um námskeiðið.  Ólöf Sverrisdóttir og Ólafur Guðmundsson leikarar og leiklistarkennarar stofnuðu skólann á sínum tíma en þau hafa bæði mikla reynslu af því að kenna. „Okkur fannst hreinlega vanta svona námskeið þar sem fullorðnir fengju tækifæri til að læra leiklist og í leiðinni að þroska sig og efla sjálfstraust í gegnum skemmtilegar leiklistaræfingar.“

Námskeiðin eru ætluð þeim sem vilja skemmta sér, losa um hömlur og fá útrás fyrir sköpunargleðina í spuna og leik. Leiklistarskólinn Opnar dyr hefur það að markmiði að gefa fullorðnu fólki tækifæri til að kynnast leikrænni tjáningu í afslöppuðu og öruggu umhverfi.  Leiklistarnámskeiðið býður uppá skapandi leiklist og sjálfstyrkingu. Meðal annars er unnið með eigin sögur, sögur spunnar og tjáðar á ýmsa vegu. Frásögn gegnum líkamann og með aðferðum trúðsins svo eitthvað sé nefnt. Einnig er farið inná núvitund í leiklist,

Allir hafa þörf fyrir að tjá sig og með því að efla leikræna hæfileika sína með skemmtilegum æfingum sem opna fyrir sköpunarflæði og ímyndunarafl fær fólk tækifæri til að þroska sjálfsöryggi á skapandi hátt. Námskeiðið hentar því öllum sem vilja tjá sig af öryggi hvort sem er í lífinu eða í leik.

Í haust verður einnig boðið uppá annarskonar námskeið, meðal annars ritlistar- og sagnanámskeið en þau verða auglýst síðar.

Námskeiðið er ætlað 17 ára og eldri og er í Listdansskólanum Engjateigi 1, 105 Reykjavík. Námskeiðið er á miðvikudögum 20.15-22.30  og hefst miðvikudaginn 20. sept. og verður í 9 skipti. Hægt er að hafa samband á netfangið iceolof@hotmail.comeða í síma; 845-8858.

Fleiri umsagnir:

„Ég mæli SKO 100% með námskeiðinu – Það er uppbyggjandi og svo svakalega skemmtilegt – Mikið hlegið og leikið sér“

„Gjörsamlega frábær námskeið sem efla sjálfstraust – og auðvelda manni að vera maður sjálfur í öllum aðstæðum. Kennarar til fyrirmyndar“

Allt er pakkað og klárt fyrir ferð Leikfélags Hafnarfjarðar á Mondial du Théâtre í Mónakó, en félagið sýnir þar Ubba kóng í næstu viku.

Leikfélag Hafnarfjarðar frumsýndi Ubba kóng eftir Alfred Jarry í leikstjórn Ágústu Skúladóttur vorið 2015.  Farið var með verkið á leiklistarhátíð í Austurríki í fyrra og nú leggur Ubbi enn á ný upp í langferð.

Mondial du Théâtre er haldin í Mónakó fjórða hvert ár á vegum AITA/IATA, International Association of Amateur Theatre, og Studio de Monaco.  24 leikhópum er boðið að taka þátt hverju sinni og sýnir hver leikhópur tvisvar sinnum.  Sýningar LH á Ubba kóngi verða dagana 29. og 30. ágúst í Théâtre Princesse Grace.

Leikfélagið er afar stolt af því að hafa verið valið til þátttöku á fremstu leiklistarhátíð heims á vettvangi áhugaleikhúss og er spennan í leikhópnum orðin mikil.  Leikarar eru 10 alls, tónlistin í verkinu er eftir Eyvind Karlsson og textar eftir Karl Ágúst Úlfsson og Þórarin Eldjárn.  Steingrímur Gautur Kristjánsson þýddi.