Rithöfundurinn, myndlistarmaðurinn og kennarinn Þorvaldur Þorsteinsson (1960-2013) féll frá langt fyrir aldur fram, en skildi eftir sig fjölda verka sem notið höfðu mikillar hylli, meðal annars örleikrit, leikrit í fullri lengd og handrit fyrir sjónvarp og útvarp. Í leiksýningunni Englinum er arfleifð Þorvaldar heiðruð.
Finnur Arnar Arnarson, myndlistarmaður og leikmyndahöfundur, skapar sýningu upp úr verkum Þorvaldar þar sem saman koma örverk, brot úr lengri verkum og vísanir í myndlist og gjörninga.
Hversdagslega súrrealísk sýning sem kemur á óvart .
Boðið verður upp á 20 mín. umræður með þátttöku listamanna eftir 6. sýningu á verkinu.
Nemendasýning á vegum Kvikmyndaskóla Íslands verður í Leikhúsinu, samastað Leikfélags Kópavogs föstudaginn 13. desember. Að verkinu standa 2. önn leiklistarbrautar og 3. önn handritadeildar Kvikmyndaskólans.
Sveitin vs. Borgin. Fimm einstaklingar. Leyndarmál. Átök. Upplausn. Leikverkið er eftir þá Arnar Má og Axel Frans í samráði við leikara og í leikstjórn Rúnars Guðbrandssonar.
Frítt er inn á tvær sýningar á föstudag en panta þarf miða.
Börnin fá sinn skammt af leiklist fyrir þessi jól. Leikhópurinn Miðnætti sýnir Jólaævintýri Þorra og Þuru í Tjarnarbíói.
Þorri og Þura eru að undirbúa jólin. Þegar afi Þorra þarf að bregða sér frá biður hann þau að passa jólakristalinn sem er uppspretta allrar jólagleði í öllum heiminum. En það gengur alls ekki nógu vel hjá þeim, því þau slökkva óvart á honum. Þorri og Þura leggja af stað í ævintýraferð til að finna leið til að kveikja aftur á kristalnum og finna jólagleðina í hjartanu. Þau lenda í ýmsum hremmingum, en allt fer þó vel að lokum. Þetta er hugljúf saga sem minnir okkur á að lítil góðverk geta haft mikil áhrif og kærleikurinn er sterkasta aflið í heiminum.
Álfarnir Þorri og Þura hafa heimsótt þúsundir leikskólabarna með farandssýningum sínum síðan árið 2008, komið fram á ýmsum hátíðum og slógu í gegn með jólaþáttunum Týndu jólin sem sýndir voru á RÚV síðustu jól. Þorri og Þura eru bestu vinir og miklir fjörkálfar, en sýningar þeirra einkennast af gleði, vináttu og dillandi skemmtilegri tónlist.
Handrit: Agnes Wild og Sigrún Harðardóttir Leikstjórn: Sara Martí Guðmundsdóttir Leikmynd og búningar: Eva Björg Harðardóttir Ljós: Hafliði Emil Barðason Dans og sviðshreyfingar: Elísabet Skagfjörð Leikarar: Agnes Wild, Sigrún Harðardóttir og Sveinn Óskar Ásbjörnsson
Leikflokkur Húnaþings vestra sýnir barnaleikritið Skógarlíf helgina 13.-15. desember nk. Leikritið er sett upp í nýrri leikgerð leikstjórans Gretu Clough sem unnið hefur til alþjóðlegra verðlauna bæði sem leikskáld og sviðslistamaður.
Er því um heimsfrumsýningu að ræða. Leikgerðin er byggð á The Jungle book eftir Rudyard Kipling. Verkið segir þroskasögu Móglís sem elst upp meðal dýra í frumskóginum og lendir í ýmsum hættum og ævintýrum.
Áhorfendur fá að kynnast fjölbreyttum og skemmtilegum sögupersónum, tónlist og hönnun undir indverskum áhrifum í framsetningu fjölbreytts og hæfileikaríks hóps fólks úr Húnaþing vestra. Leikflokkurinn hefur vakið athygli undanfarin ár fyrir vandaðar og áhugaverðar sýningar og skemmst að minnast uppsetningar þeirra á Hárinu sem valin var Athyglisverðasta áhugaleiksýning ársins 2019.
Leikverk byggt á ævi söngvarans Vilhjálms Hólmars Vilhjálmssonar verður sett upp á fjölum Borgarleikhússins leikárið 2020-2021. Höfundar verksins eru þeir sömu og settu upp vinsælasta leikverk Borgarleikhússins frá upphafi, Elly.
Gísli Örn Garðarsson leikstjóri er annar höfunda fyrirhugaðs verks, ásamt Ólafi Agli Egilssyni.
Elly sem frumsýnd var í mars 2017 varð með tímanum vinsælasta sýning Borgarleikhússins, ekkert verk hefur verið sýnt jafn oft og yfir hundrað þúsund manns sáu verkið í Borgarleikhúsinu.
Vilhjálmur Vilhjálmsson fæddist 11. apríl árið 1945 í Merkinesi í Höfnum á Suðurnesjum. Villi var yngstur fimm systkina, Elly var næst elst systkinanna. Villi hóf árið 1965 að syngja með hljómsveit Ingimars Eydal en tónlistin varð aðalstarf Vilhjálms árið 1967. Villi og Elly sungu jafnan saman og kom platan Systkinin Vilhjálmur og Elly syngja saman árið 1969. Unnu þau alls fjórar plötur saman og náðu þær allar miklum vinsældum.
Vilhjálmur lést í Lúxemborgar árið 1978 í sviplegu umferðarslysi.
Leikfélag Mosfellssveitar í samstarfi við tónlistardeild Listaskóla Mosfellsbæjar æfir um þessar mundir nýjan söngleik sem ber heitið ❄Bylur❄. Sagan gerist á afskekktu hóteli í ónefndum bæ á Þorláksmessu, en þar sjá nokkrir strandaglópar fram á að þurfa að eyða jólunum saman sökum blindbyls sem herjar á bæinn. Þarna fléttast saman sögur alls konar fólks sem er saman komið á hótelinu í mismunandi erindagjörðum. Leynifundir, jólabjöllur, snjóblásarai, steikt slátur í bland við grípandi vetrar- og jólalög í skemmtilegum útsetningum ættu að koma öllum í jólaskapið.
Hljómsveitin er skipuð nemum í Listaskóla Mosfellsbæjar og Kvennakórinn Stöllurnar undir stjórn Heiðu Árnadóttur leika og syngja ásamt félögum í Leikfélagi Mosfellssveitar. Handritið skrifuðu María Guðmundsdóttir og Sigrún Harðardóttir, leikstjórn er í höndum Sigrúnar Harðardóttur og Agnesar Wild, leikmynd hannar Eva Björg Harðardóttir og búninga og leikmyndasmíði er í höndum stærðar hóps sem vinnur bakvið tjöldin. Sýningarstjóri er Kolfinna Rut Schjetne
Á hverri sýningu kemur gestasöngvari og tekur lagið, en meðal söngvara verða GDRN, Guðrún Gunnarsdóttir, Diddú, Bjarni Atlason, Jógvan Hansen og Greta Salome.
Ekki missa af þessum stórskemmtilega söngleikur sem kitlar hláturtaugarnar, frábær skemmtun í skammdeginu!
Næstu sýningar eru: fös 13/12, fim 19/12 og fös 20/12.
Einar er alltaf einn. Líka á jólunum. En Einari leiðist aldrei. Hann finnur alltaf upp á einhverju til að gera einveruna áhugaverða. Þegar hann lokast uppi á háalofti heima hjá sér á aðfangadag þarf hann að gera sitt besta til að halda hátíðina heilaga. En Einar er óheppinn og á það til að flækjast í jólaseríum eða lenda i slagsmálum við hangikjöt.
Þessi sýning var tilnefnd til Grímuverðlauna með Berg Þór Ingólfsson í aðalhlutverki en hann er einnig höfundur og leikstjóri sýningarinnar. Barna- og fjölskyldusýningar Bergs eru margrómaðar. Má þar nefna Mary Poppins, Billy Elliot, Horn á höfði, Hamlet litla og Bláa hnöttinn. Einar mun hringja inn jólin á gamansaman og hjartnæman hátt fyrir yngstu áhorfendur Borgarleikhússins og fjölskyldur þeirra.
Jólaleikritið Leppalúði verður sýnt í Hólmavík í félagsheimlinu 5 des. og 7. des verður sýning á Þingeyri.
Leppalúði hefur verið á ferð og flugi um landið síðan um miðjan nóvember. Frumsýnt var á Tálknafirði 13. nóvember og síðan þá hefur leikurinn verið sýndur á Bíldudal, Patreksfirði, Reykjavík, Reykhólum, Hvammstanga, Skagaströnd, Blönduósi, Barðaströnd, Þingeyri, Búðardal og í Borgarnesi.
Margir hafa heyrt hans getið en fæstir vita mikið um hann ef nokkuð. Enda hefur hann ávallt fallið í skuggann á konu sinni, henni Grýlu. En nú er lok röðin loksins komin að Leppalúða. Leikritið gerist í Grýluhelli hvar Leppalúði vaknar fyrstur allra og þá fer hann að gera það sem honum finnst skemmtilegast að gera. Hvað skyldi það nú vera? Jú, að gera ekki neitt.
Hver er hann eiginlega? Talar hann mannamál? Er hann í alvörunni til? Höfundur/Leikari: Elfar Logi Hannesson Búningur: Alda S. Sigurðardóttir Tæknilegar lausnir og galdrar: Kristján Gunnarsson Leikmynd/Gríma/Leikstjórn: Marsibil G. Kristjánsdóttir
Ormur Óðinsson er 16 ára og rétt að klára grunnskólann. Hann er að sjálfsögðu snillingur og töffari en það þýðir ekki endilega að allt hans líf sé í góðum gír. Vinir, hugsjónir, fjölskylda, skoðanir, ljóð, óvinir, skóli og ást – allt blandast þetta saman og flækist hvað fyrir öðru í tvísýnu spili um hug hans og hjarta.
Nú eru einungis þrjár sýningar eftir af þessari stórskemmtilegu sýningu.
Miðasala fer fram í símum 666 0170 eða 666 0180 frá 17-19 virka daga og 14-16 á laugardögum.
Nú fer hver að verða síðastur að sjá þennan margverðlaunaða söngleik því síðustu sýningar eru nú í desember.
Þessi magnaði söngleikur byggir á sögu Roalds Dahl og fjallar um Matthildi, óvenjulega gáfaða og bókelska stúlku með afar ríkt ímyndunarafl. Foreldrar hennar eru hins vegar fáfróð og óhefluð og skólastjórinn hreinasta martröð. Matthildur lumar á ýmsum ráðum gegn ranglæti og heimskupörum og tekst að vinna sér sess í veröldinni með samviskuna og hugrekkið að leiðarljósi.
Söngleikurinn Matthildur hefur hlotið hátt í hundrað verðlaun af ýmsu tagi og þar af sextán verðlaun sem besti söngleikur. Leikstjóri er Bergur Þór Ingólfsson sem á að baki stóra söngleikjasigra á borð við uppfærslurnar á Billy Elliot og Bláa hnettinum.
