Stúart Litli er glænýr fjölskyldusöngleikur stútfullur af söng og dansi með splunkunýrri tónlist eftir Valgeir Skagfjörð.

Söngleikurinn er byggður á bókinni Stúart Litli eftir E.B. White og samnefndri kvikmynd eftir Rob Minkoff.

Blær vill ekkert meira í heiminum en að eignast lítinn bróður. Friðrik Kríli og Nóra Kríli kynnast lítilli mús að nafni Stúart, kolfalla fyrir honum og ættleiða hann. Blær og heimiliskötturinn Snjói verða hins vegar ekki sátt við nýja fjölskyldumeðliminn. Við fylgjumst með Stúart takast á við ýmsar áskoranir og lenda í skemmtilegum ævintýrum.

Sýningin er frumsýnd 5.nóvember og verður sýnd alla sunnudaga í vetur kl 16:00 í Bæjarleikhúsinu. Miðaverð er 2.900 krónur og hægt er að panta miða í síma 566 7788.

Frumsýning 5.nóvember kl 18:00 UPPSELT
2.sýning 7.nóvember kl 16:00
3.sýning 14.nóvember kl 16:00
4.sýning 21.nóvember kl 16:00
5.sýning 28.nóvember kl 16:00
6.sýning 5.desember kl 16:00

Ronja ræningjadóttir fjallar um dóttur ræningjaforingjans Mattíasar og hvað gerist þegar hún tekur upp á því að vingast við Birkir sem er sonur Borka erkióvinar hans. Við kynnumst þeim Ronju og Birkir og þeirra ævintýrum, við kynnumst skemmtilegum ræningjaflokkum ásamt nornum, rassálfum, grádvergum og hermönnum.

Sagan segir okkur hversu mikilvæg vináttan er í blíðu og stríðu og einnig að það er allt miklu skemmtilegra þegar allir eru sáttir og allt leikur í lyndi.

Leikfélag Sauðárkróks setur upp 2 sýningar á ári og er með elstu og virkustu áhugamannafélaginu á landinu.

Félagið var fyrst stofnað 1888 og starfaði í nokkur ár en var svo endurvakið 1941 og fagnar því 80. ára afmæli á þessu ári. Við alheimsfrumsýndum leikritið Á frívaktinni eftir Pétur Guðjónsson í maí sl. En nú er komið að barna og fjölskylduleikritinu Ronju ræningardóttir eftir Astrid Lindgren

Í sýningunni eru 24 leikarar í 33 hlutverkum en alls koma um 60 manns að sýningunni. Sýningin er víðamikil bæði innan sviðs sem utan. Ronja er skemmtilegt og fallegt leikrit sem hentar öllum bæði börnum og fullorðnum en gott að minna á að það er gott að undirbúa yngstu leikhúsgestina að það koma t.d. nornir og grádvergar við sögu sem geta valdið þið að fólki bregður en minna ef það er búið að útskýra áður.

Miðapantanir í síma 849 9434

Örn Árnason hefur alltaf verið á besta aldri! Hvernig má það þá vera að hann sé að verða einn af „gömlu körlunum“ í leikhúsinu?

Örn rennir sér nú fótskriðu inn á sjötugsaldurinn með persónulegri, fjörugri, einlægri og umfram allt bráðskemmtilegri sýningu. Örn horfist í augu við sjálfan sig, ferilinn og ýmsa góðkunningja sem hafa fylgt honum og íslensku þjóðinni í gegnum árin, rifjar upp gömul og góð kynni og horfir fram á veginn. Og eins og alltaf þegar Örn er annars vegar er tónlistin skammt undan, og líkt og oft áður er það Jónas Þórir Þórisson sem leikur hér ásamt Erni við hvern sinn fingur.

Eftir að hafa farið á hundavaði um sögu íslensku þjóðarinnar í þremur brakandi skemmtilegum sýningum – Sögu þjóðar, Öldinni okkar og Kvenfólki – snýr hinn óviðjafnanlegi dúett Hundur í óskilum aftur og ræðst á einn af hornsteinum íslenskrar menningar – sjálfa Njálu.

Drepfyndin sýning þar sem þeir Hjörleifur Hjartarson og Eiríkur Stephensen hlaupa meira en hæð sína í öllum herklæðum í gegnum skrautlegt persónugallerí Njálu. Við sögu koma taðskegglingar, hornkerlingar, kinnhestar, kartneglur og þjófsaugu svo fátt eitt sé nefnt.

Undanfarnar vikur hefur staðið yfir uppsetning og æfingar á gamanleikritinu Beint í æð! eftir Ray Cooney í þýðingu Gísla Rúnars Jónssonar heitins. Verkið er hvorki meira né minna bráðfyndið og drephlægilegt, eða “bráðdrepandi og hlægilega fyndið” eins og leikstjórinn, Gunnar Björn Gunnarsson, mismælti sig svo skemmtilega á einni æfingunni.

Á sviðinu verða bæði þrautreyndir og glænýjir leikfélagar, og úrvalsfólk á bakvið tjöldin. 11 leikarar eru á sviði en í heildina koma að 40 manns að uppsetningunni í ár. “Við vildum endilega hefja leikárið með hlátri og gleði, það veitir ekki af eftir síðustu misseri” segir Guðný Lára Gunnarsdóttir, formaður leikfélagsins.

Sýnt verður flesta þriðjudaga, fimmtudaga og föstudaga klukkan 20:00 og sunnudaga klukkan 18:00

Næstu sýningar:
Frumsýning föstudagur 29. okt – UPPSELT
2. sýning sunnudagur 31. okt klukkan 18:00
3. sýning þriðjudagur 2. nóv klukkan 20:00
4. sýning fimmtudagur 4. nóv klukkan 20:00
5. sýning sunnudagur 7. nóv klukkan 18:00

Einnig má senda póst á midasala@leikfelagselfoss.is eða hringja í síma 4822787 eftir klukkan 18 á daginn
Almennt verð 2500 kr
Hóptilboð 10+ 2000 kr
Salurinn (80 sæti) 120 þúsund

Heiðbrá hafði gefið upp alla von þar til hún hitti ástina sína hinum megin á hnettinum sem kynnti hana fyrir mætti „cacao“. Síðan þá hefur parið staðið í stórræðum og planar hvern viðburð á fætur öðrum. Framtíðin hefur aldrei verið bjartari. Konserta frumsýnir djarft, nýtt sviðsverk með aðferða- og fagurfræði snjallsímans að leiðarljósi.

Sérstakar þakkir fá: Hákon Jóhannesson, Ragnar Kjartansson, Margrét Bjarnadóttir, Katrín Gunnarsdóttir, Tómas Sturluson, Svanhildur Gréta Kristjánsdóttir, Sóley Lee Tómasdóttir, Ester Rún Mondragon, Sigurbjartur Sturla Atlason, Hjalti Rúnar Jónsson, Dansverkstæðið, starfsfólk og stjórn Þjóðleikhússins.

Leikhópurinn Konserta var stofnaður árið 2019 og notast við handahófs- og óreiðukenndar vinnuaðferðir við sköpun sviðsverka sem leka eins og ísmolar niður á bak áhorfenda. Eina regla Konserta er að það er allt í lagi að vera smá slappur.

Sundurlimuð lík, smygl og ólöglegir innflytjendur var ekki beint það sem Tom og Linda sáu fyrir sér daginn sem konan frá ættleiðingarstofunni ætlaði að koma til að taka út aðstæður á heimilinu. Dick og Harry, hinir vitgrönnu bræður Tom, sjá hinsvegar til þess að allt fer úrskeiðis sem mögulega getur gert það.

Leikfélag Fljótsdalshéraðs frumsýnir vandræðafarsann Tom, Dick og Harry í leikstjórn Ármanns Guðmundssonar að Iðavöllum 23. október. Verkið er eftir þá feðga Ray og Michael Cooney en Cooney eldri hefur verið ókrýndur konungur farsans um margra ára skeið. Níu leikarar taka þátt í sýningunni en mest mæðir á Víði Má Péturssyni í hlutverki hins ólámsama og sífellt taugaveiklaðri Tom.

Miðasala er á midasala.lf@gmail.com,  eða í síma 862-3465.
 Athugið að miðar eru ekki seldir á staðnum.
Miðaverð 3000 og 2500 fyrir öryrkja og eldri borgara.
Frumsýnt er á Iðavöllum laugardaginn 23. október klukkan 20:00.

Næstu sýningar:
2.sýning, 24.október kl. 20:00
3.sýning, 27.október kl. 20:00

Vorið 2019 hélt Freyvangsleikhúsið handritasamkeppni og bárust nokkur handrit í samkepnnina, send til félagsins undir dulnefnum höfunda. Tekin var ákvörðun um að setja á svið verkið Smán og á daginn kom að verkið var eftir Sigríði Láru Sigurjónsdóttur. Fyrirhugað var að setja upp verkið haustið 2020 en ástandið í samfèlaginu gerði það að verkum að ákvðið var að fresta uppsetningu til hausts 2021. Sindri Swan var fenginn til að leikstýra og æfingar hófust í haust.

Sindri leikstjóri og höfundurinn, Sigríður Lára hafa síðan unnið saman að því að stílesera og útfæra verkið svo útkoman verði sem glæsilegust. Að verkinu kemur svo stór hópur af fólki til þess að gera þetta allt að raunveruleika því að sjálfsögðu þarf leikarahóp, hönnuði, smiði, tæknifólk og alla aðra sem gera frábæra sýningu.

Smán er leikverk sem fjallar um 6 ólíka einstaklinga, sem við fáum að fylgjast með yfir langa helgi, þar sem líf þeirra flèttast saman á kaffihúsi/bar. Einnig eru nokkrar aukapersónur sem gæða staðinn lífi, hver á sinn hátt.
Alheimsfrumsýning á Smán er 22.október, nánari upplýsingar eru að finna á freyvangur.is sem og á feisbúkksíðu Freyvangsleikhússins.

Ein skemmtilegasta ópera tónlistarsögunnar

Nemorino trúir ekki því sem hann les í bókum. Hann trúir hinsvegar því sem honum er sagt að standi í bókum. Hann kann nefnilega ekki að lesa. Adina er vön að fá athygli frá karlmönnum. Hvað gerir hún þegar einhver hættir að sýna henni athygli? Belcore vantar konu. Belcore vantar alltaf konu. Það væri fullkomin fjöður í hattinn fyrir svona flottan offisér. Dulcamara er búinn að flytja sömu söluræðuna mörghundruð sinnum. Hann veit alveg að „töfralyfin“ hans virka ekki. En hvað ef þau gera það?

Sviðslistahópurinn Óður
Sviðslistahópurinn Óður neitar að geyma óperur í glerkössum. Þau vilja miklu frekar taka þær upp, hrista af þeim rykið og leika sér að þeim, pota í óskrifaðar reglur og skemmta sér og öðrum. Þau trúa á nálægð við áhorfendur og einlæga túlkun á tungumáli sem áhorfendur skilja.

Leikfélagið Hugleikur stendur fyrir námskeiði í brelluförðun (special effects) 16. og 17. október. Leiðbeinandi er Ninna Karla Katrínardóttir. Þátttakendur læra að nota latex og vax við sáragerð og aðrar leikhúsbrellur. Þeir læra um bestu aðferðir og val á réttum litum fyrir marbletti, sár, hrukkur og fleira. Vilji þátttakendur fræðast um fleiri atriði í leikhúsförðun gefst færi á umræðum og mögulega sýnikennslu tengt þeim.
Ninna Karla Katrínardóttir hefur mikla reynslu af leikhúsförðun og er með diplómu í listförðunarfræði frá MASK, Makeup&Airbrush Academy.

Skipulag námskeiðs verður eftirfarandi:-
Laugardagur kl. 11-15 – Farið verður í hvernig latex og vax eru notuð. Ninna verður með sýnikennslu en einnig fá þátttakendur að prófa aðferðirnar hvert á öðru eða á sjálfum sér. Ef tími gefst geta þátttakendur hafið undirbúning að verkefni seinni dagsins.

Sunnudagur kl. 11-15 – Þátttakendur hafa með sér módel og búa til karakter. Módelið má vera af hvaða kyni sem er og á hvaða aldri sem er en gott er að hafa í huga að módelið henti vel í fyrirhugað verkefni. Útfærsla verkefnisins er valfrjáls, velja má karakter úr leikriti eða kvikmynd eða búa til sinn eigin karakter. Þátttakendur vinna „heildarlúkk“, þ.e. förðun og búning, en nýta það sem þer lærðu daginn áður og sýna það í lúkkinu. Ninna verður þeim að sjálfsögðu innan handar og deginum lýkur á myndatöku. Gott er að hafa í huga námskeiðið gæti dregist á langinn þann dag.

Laus eru 8 sæti á námskeiðinu og kostar það 8.000 kr. fyrir félaga í Hugleik sem greitt hafa félagsgjöld yfirstandandi leikárs, en 12.000 kr fyrir aðra. Innifalið í námskeiðsgjaldi er aðgangur að öllum efnum og áhöldum sem nota þarf í leikhúsförðun og nóg af kaffi. Námskeiðið fer fram í húsnæði leikfélagsins Hugleiks að Langholtsvegi 109-111 (gengið inn baka til).