Njála er nýtt íslenskt leikverk eftir þá Þorleif Örn Arnarsson og Mikael Torfason sem byggir á Brennu-Njálssögu, einni ástsælustu sögu okkar Íslendinga. Sagan hefur lifað með þjóðinni í sjöhundruð ár, lesin í öllum menntaskólum landsins og sjaldan verið vinsælli en einmitt nú.  Hún segir frá því hvernig við urðum að þjóð, og hetjur bókarinnar, þau Gunnar, Skarphéðinn, Njáll, Hallgerður og Bergþóra eru sveipuð goðsagnakenndum ljóma og hafa mótað og markað þjóðarsálina allt til þessa dags. Leikhópurinn undir stjórn Þorleifs Arnar Arnarssonar ásamt Ernu Ómarsdóttur, danshöfundi og dansara, munu tjalda öllu til og nýta ótakmarkaða töfra leikhússins til að takast á við þessa stórbrotnu sögu í sýningu sem verður í senn forvitnileg, ögrandi og litrík leikhúsveisla. Bardagar, ástir, hefndir og völd en umfram allt Njála eins og þú hefur aldrei séð hana áður! 

Mikael Torfason er blaðamaður og rithöfundur og vakti fyrst athygli með skáldsögunni Falskur fugl sem kom út árið 1997, síðan hefur hann sent frá sér fjórar skáldsögur og leikritið Harmsögu. Þorleifur Örn Arnarson hefur getið sér gott orð sem leikstjóri hérlendis og erlendis og hefur unnið m.a. unnið leikgerðirnar að Englum alheimsins og Sjálfstæðu fólki. 

Erna Ómarsdóttir er vafalaust einn virtasti dansari og danshöfundur Íslendinga og hafa verk hennar verið sýnd á hinum ýmsu dans- og listahátíðum víða um heim. Hún hefur unnið með nokkrum af fremstu dans- og sviðslistahópum Evrópu og listamönnum á borð við Jan Fabre, Sidi Larbi Cherkaoui, Björk, Jóhanni Jóhannsson og Gabríelu Friðriksdóttur. Erna hefur víða vakið athygli fyrir sinn einstaka stíl og hlotið mikið lof fyrir verk sín, núna síðast fyrir verkið Black Marrow sem hún samdi ásamt Damien Jalet, en það verk var einmitt tilnefnt til Grímuverðlaunanna 2015 sem Sýning ársins.

Laugardaginn 28. nóvember 2015 var 300 sýningin af How to become Icelandic in 60 minutes sýnd í Hörpu.

Höfundur verksins er Bjarni Haukur Þórsson og leikstjóri er Sigurður Sigurjónsson. Leikarar eru Karl Ágúst Úlfsson og Örn Árnason.

Þetta er fjórða árið sem verkið hefur verið í sýningu í Hörpu. How to become Icelandic in 60 minutes er sambland af söguleikhúsi og uppistandi þar sem reynt verður að kenna þeim sem sýninguna sækja að verða Íslendingar. Þetta er sprenghlægileg klukkustundarlöng sýning sem ætluð er öllum þeim sem vilja læra hvað það er að vera Íslendingur. Samstarf Bjarna Hauks og Sigurðar ætti að vera íslensku þjóðinni vel kunnugt enda hefur samstarf þeirra getið af sér þrjár vinsælar sýningar; Hellisbúann, Pabbann og Afann.

Þetta er grín á leið í Hörpuna, án djóks.

Menningarfélag Akureyrar mun senn fara með verkið Þetta er grín, án djóks í leikferð í höfuðborgina, en leikritið verður flutt í Eldborgar-sal Hörpu þann 28.nóvember. Þetta er grín án djóks, er sviðsetning Leikfélags Akureyrar í samstarfi við Menningarhúsið Hof og er samið af þeim Dóra DNA og Sögu Garðarsdóttur sem jafnframt leika aðalhlutverkin. Leikstjóri er Jón Páll Eyjólfsson.

Saga og Dóri eru uppistandarar og þau eru líka kærustupar. Þau elskast, rífast, semja brandara og eru ósammála um hvort betra sé að fara til New York eða á Hornstrandir til að rækta sambandið. Dóri og Saga eru kaldhæðin, upptekin af sjálfum sér og of mikið á netinu. Það er ekkert grín að vera einstaklingur í sjálfhverfu sambandi og í samkeppni við einu manneskjuna sem skilur mann. Það eina sem þau óttast er að segja óviðeigandi brandara og verða fyrir vikið jörðuð á öllum miðlum. En hvað er óviðeigandi brandari? Er grín ekki alltaf leikur á línunni? Og hversu óviðeigandi þarf mjög fyndinn brandari að vera til að maður sleppi honum? Er grín einhvern tímann ókeypis? Meira að segja fimm aura brandarar hafa verðmiða og hvað kostaði þá Grínverjinn?

Sýningin hefur verið sýnd fyrir fullu húsi í Hofi á Akureyri í haust og hefur hún hlotið einróma lof gagnrýnenda og áhorfenda. Nú gefst höfuðborgarbúum tækifæri til þess að njóta hennar.

Aðeins þessi eina sýning er fyrirhuguð í Reykjavík. Miðasala er hafin og hægt er að nálgast miða á vef Hörpu og á tix.is.

Improv Ísland ásamt Anthony Atamanuik – AÐEINS EIN SÝNING!
Einn besti spunaleikari New York, Anthony Atamanuik mun sýna með spunaleikurum frá Improv Ísland mánudagskvöldið 7.desember.
Anthony er í einum þekktasta spunaleikhóp Bandaríkjanna, Asssscat, ásamt Amy Poehler, Tinu Fey og fleirum. Hann hefur m.a komið fram í Broad City og 30 Rock og sýnir reglulega og kennir í UCB leikhúsinu í NY.

Stórkostlegir gestir koma fram með okkur sama kvöld:

Ingvar E leikur sitt hlutverk úr senu, á móti Anthony sem veit ekki um hvað senan er og spinnur á móti. Einnig kemur Ari Eldjárn og fer með sannsögulegan mónólóg út frá einu orði frá áhorfendum, og leikhópurinn spinnur sýningu ásamt Anthony inspireraða af því.

Karl Olgeirsson spilar undir frumsömdum söngleik.

Takmarkaður miðafjöldi í boði!

Næstu sýningar Improv Ísland eru ekki fyrr en í febrúar.

Miðasala á midi.is eða leikhusid.is

Félagarnir Eiríkur Stephensen og Hjörleifur Hjartarson í hljómsveitinni Hundur í óskilum setja upp, í tilefni af 20 ára afmæli sveitarinnar, glænýtt leik- og tónverki sem kallast  Öldin okkar.

Hundinum er náttúrlega ekkert íslenskt óviðkomandi; hann gefur sig í tali og tónum að mannlífinu til sjávar og sveita, ræður í gjörðir stjórnmálamanna og spyr allra spurninganna sem brenna í brjóstum leikhúsgesta.

Frábær skemmtun með helstu tvenndarleikurum landsins!

Leikstjórn er í höndum Ágústu Skúladóttur, Axel Hallkell Jóhannesson sá um leikmynd og búninga og Björn Bergsteinn Guðmundsson sá um lýsingu. Sýningin er sýnd á Nýja sviði Borgarleikhússins.

Fyrir 30 árum mynduðu fimm kumpánar hóp sem tók að hittast reglulega og hafa í flimtingum flest milli himins og jarðar. Sumir kölluðu þá rugludalla, aðrir kölluðu þá snillinga, enn aðrir dóna, klámhunda og guðlastara. Sjálfir kölluðu þeir sig Spaugstofuna. Þetta samstarf reyndist í meira lagi vanabindandi – og enn hefur þeim ekki tekist að hætta.

Nú birtast þeir á Stóra sviði Þjóðleikhússins með sýninguna Yfir til þín – Spaugstofan og hafa líklega aldrei verið ruglaðri. Að minnsta kosti er þeim ennþá ekkert heilagt.

Höfundar og leikarar: Karl Ágúst Úlfsson, Pálmi Gestsson, Randver Þorláksson, Sigurður Sigurjónsson, Örn Árnason

Söngtextar og bundið mál: Karl Ágúst Úlfsson

Tónlist: Karl Ágúst Úlfsson, Örn Árnason, Gunnar Þórðarson og fleiri

Tónlistarstjórn: Jónas Þórir Þórisson

Leikfélagið Verðandi, leikfélag Fjölbrautarskólans í Garðabæ stendur nú fyrir barnasýningu til að styrkja menningarleg tengsl við yngri deildir grunnskóla ásamt því að hafa fjáröflun fyrir leikfélagið sjálft, sem ætlar að setja upp söngleikinn South Park: Bigger, Longer & Uncut í leikstjórn Agnars Jóns Egilssonar.

Nemendur Fjölbrautarskólans í Garðabæ koma aðeins að verkinu. Tímans Gestur er eftir Reginn Tuma Kolbeinsson, Urði Bergsdóttur og Unni Agnesi Níelsdóttur. Verkið segir frá tímaflakkaranum Gesti, hann ferðast um tímann í kistu, sem ung stúlka að nafni Emilía á. Eitt kvöldið hittast þau og ferðast fram og aftur í tímann, þau hitta t.d. risaeðlur, vonda drottningu, dreka og fara meðal annars á tunglið.

Leikstjóri er Unnur Agnes Níelsdóttir. Tíu leikarar eru í sýningunni og bregða þau sér í ýmis hlutverk. Tímans Gestur verður frumsýnt þann 7. nóvember næstkomandi.

Tímans Gestur er bráðskemmtilegt og ævintýralegt verk sem hentar öllum börnum frá 1.-7. bekk í gruunskóla.

Upplýsingar um komandi sýningartíma og leikfélagið sjálft má finna á facebook síðu þeirra: https://www.facebook.com/verdandi?fref=ts

Það eina sem varpar skugga á annars fullkomið fjölskyldulíf í 210 Garðabæ er félagsmálaíbúð í stórri blokk í bænum. Þegar sonur Sóleyjar, fyrirmyndarhúsmóður, er lagður í einelti efast hún aldrei um hvar sökudólginn er að finna. Sóley og tvær bestu vinkonur hennar ákveða að taka málin í sínar hendur og banka upp á hjá „félagsmálapakkinu“ í blokkinni í Hrísmóum. Inngrip þeirra fer þó á allt annan veg en þær ætluðu sér í upphafi og skyndilega er hið fullkomna líf þeirra allra komið úr skorðum.

Meinfyndið og spennandi verk um hvað leynist undir sléttu og felldu yfirborðinu. Hversu langt eru húsmæðurnar í (90)210 Garðabæ tilbúnar að ganga til að halda sannleikanum leyndum?

Leikfélagið Geirfugl í samstarfi við Þjóðleikhúsið. (90)210 Garðabær er eftir Heiðar Sumarliðason, hann sér einnig um leikstjórn. Leikarar eru þau María Heba Þorkelsdóttir, Stefán Hallur Stefánsson, Svandís Dóra Einarsdóttir, Sveinn Ólafur Gunnarsson, Vígdís Másdóttir. Leikfélagið Geirfugl í samstarfi við Þjóðleikhúsið. Sýningin er styrkt af Mennta- og menningarmálaráðuneytinu.

Sýningin er styrkt af Mennta- og menningarmálaráðuneytinu.

Þann 22. október, frumsýndi Menningarfélag Akureyrar glænýtt íslenskt verk í sviðsetningu Leikfélags Akureyrar og menningarhússins Hofs. Verkið ber titilinn Þetta er grín, án djóks og er eftir þau Halldór Laxness Halldórsson (Dóra DNA) og Sögu Garðarsdóttur.

Um er að ræða sprenghlægilegt gamanverk þar sem þau Saga og Dóri leika sig sjálf… ef þau væru kærustupar. Þau elskast, rífast, semja brandara og eru ósammála um hvort betra sé að fara til New York eða á Hornstrandir til að rækta sambandið. Dóri og Saga eru kaldhæðin, upptekin af sjálfum sér og of mikið á netinu. Það er ekkert grín að vera einstaklingur í sjálfhverfu sambandi og í samkeppni við einu manneskjuna sem skilur mann. Það eina sem þau óttast er að segja óviðeigandi brandara og verða fyrir vikið jörðuð á öllum miðlum. En hvað er óviðeigandi brandari? Er grín ekki alltaf leikur á línunni? Og hversu óviðeigandi þarf mjög fyndinn brandari að vera til að maður sleppi honum? Er grín einhvern tímann ókeypis? Meira að segja fimm aura brandarar hafa verðmiða og hvað kostaði þá Grínverjinn?

Sem fyrr segir eru það þau Saga og Dóri sem fara með aðalhlutverk sýningarinnar en auk þeirra stígur Benedikt Karl Gröndal á svið og er hann í hlutverki ákaflega misheppnaðs umboðsmanns þeirra skötuhjúa. 

Jón Páll Eyjólfsson leikstýrir gríninu og þá fara betri helmingar þeirra Sögu og Dóra með mikilvægt hlutverk í sýningunni. Magnea Guðmundsdóttir, eiginkona Dóra, hannar leikmynd og búninga fyrir verkið og kærasti Sögu, tónlistarmaðurinn Snorri Helgason, á hljóðmynd og útsetningar.